Read Makassar Version – KITTA' MATANGKASA PAMMUJI 17 Bible Online

PAMMUJI 17 - Makassar Version – KITTA' MATANGKASA bible

PAMMUJI 17

¹Pappala' doanna Daud. Kipilangngeri pakkiokku appala' kaadelang, Kiparhatikangi pappala' doang ati maci'nongku, o, Batara.

²Poro Kipattojenga' ri parkaraku saba' Kiassengi apa annabaya.

³Punna Kiso'ri pa'maikku na Kibattu amparessa' ri wattu bangngi, laKiassemmi ati maci'nongku, kana-kanangku situruki nawa-nawangku.

⁴Kugaukangi apa Kiparentakanga na tena kuoloi oloang katerassanga.

⁵Tuli kuturuki pappijo'jotTa lalang tallasakku tena kule'ba' ammengka sala ri anjo oloanga.

⁶Makkioka' ri Katte, o, Allata'ala, saba' iKatte ampilangngeria'; parhatikanga' siagang pilangngeri kana-kanangku.

⁷Kipicinikianga' pangngamaseang malompoTa saba' Kipasalamaki tau ma'la'langa mae ri Katte, amangi ke'nanga ri sa'rinta battu ri pa'bakkana musua.

⁸Kiparakaia' sanrapang lisere' matanTa, kicokkoa' lalang ri la'lanna ka'nyitTa

⁹battu ri pa'bakkana tau ja'dalaka. Nitammulilia' ri musu eroka ambunoa';

¹⁰tangngassengai mangngamaseang ke'nanga siagang a'bicara tampoi ke'nanga.

¹¹Majumi ke'nanga angngewa' siagang angkatulunga', a'boya kasampatang ero' ampatappasaka'.

¹²Sanrapangi singa ke'nanga eroka angkokkoki musunna singa rungka angngadanga ri tampa' taccokkoa.

¹³Ammenteng maKi', o, Batara ewai musungku siagang naKibeta ke'nanga. Kipasalamakka' siagang pa'danTa battu ri pa'bakkana tau ja'dalaka.

¹⁴Kilappassanga' battu ri sikamma tau eroka appatambung pa'barang-barangngang ri lino. Kihukkungi ke'nanga siagang bala lompo ia le'baka Kipasadia untu' ke'nanga Lappassammi nihukkung todong ana' cucunna ke'nanga.

¹⁵Mingka lamacconga' accini' mae ri Katte, lanri tena nakusala. Ri wattungku ambangung, kahaderanTa ampakarannui pa'maikku.