Read Makassar Version – KITTA' MATANGKASA PAMMUJI 22 Bible Online

PAMMUJI 22 - Makassar Version – KITTA' MATANGKASA bible

PAMMUJI 22

¹Untu' pamimping pakelong. Situru' lagu: Jonga ri wattu bari'basa'. Pammujina Daud.

² Allata'alaku, o, Allata'alaku, angngapa naKibokoia'? Akkioka', mingka tuli bellaKi' na tena naKitulunga'.

³O, Allata'alaku, akkioka' ri wattu allo, mingka tuli a'merekiKi'. Appala' doanga' ri wattu bangngi, mingka tena todong na sannang atingku.

⁴Mingka iKattemi Karaeng Kaminang Matangkasaka, nipuji-pujia ri tu Israel.

⁵Boe-boena ikambe manrannuangi ri Katte, manrannuangi ke'nanga, nakipasalama' ke'nanga.

⁶Akkioki ke'nanga ri Katte na Kilappassang ke'nanga; manrannuangi ke'nanga na tena Kipassalasai.

⁷Mingka inakke anne sanrapanja' gallang-gallang, teai rupatau, nicau-cau na nihina ri tau jaia.

⁸ Yangaseng accinika ri nakke, nacau-caua', nabibeia' munceng na napammenggong ulunna.

⁹ Nakana ke'nanga, “Lappassammi napattoang Bataraya, sollanna nipasalama' ri Batara, punna sannang Batara mae ri ia!”

¹⁰IKattemi ampasulukka' battu ri pammanakkanga, siagang ampakaamanga' ri riwaanna ammakku.

¹¹Battu ri lassukku, lalang limanTai sarengku, battu ri lalangku ri battang, iKattemi Allata'alaku.

¹²TeaKi' bellai, saba' a'reppese'mi bahayaya, na tena antulunga'.

¹³Sanrapangi tedong romang jaia, musua angkatulunga', sanrapang tedong romang liara' battu ri Basan angkatulunga'.

¹⁴Tassungkei bawana ke'nanga andallekanga', sanrapang singa ammarrunga sa'ranna ero' angngokko'.

¹⁵Tenamo kagassingangku sanrapang je'ne' tattumpaya, sikontu bukungku sangkamma ta'lappasa' ngasemmi ri lesoanna, assolommi atingku sanrapang liling.

¹⁶ Kalotoro'mi karro'-karrokku sanrapang kaca ancuruka, a'dakki'mi lilaku ri nga'ngalakku. O, Batara, angngapa naKibokoia' irate ri limbu'buka sanrapang tau mateamo.

¹⁷Nikatulunga' ri garombolang tau ja'dalaka; sanrapang kongkong jaia ke'nanga angkatulunga, anto'do'-to'doki limangku siagang bangkengku.

¹⁸Sikontu buku-bukungku akkullei kirekeng, nacinikia' musungku sanrapang cini'-cinikang.

¹⁹ Nabage-bagei ke'nanga pakeangku, na'goccang nomoro' untu' anggappai jubaku.

²⁰Mingka iKatte, teaKi' bellai, o, Batara, battu maKi' linta' antulunga', saba' iKattemi kagassingangku.

²¹Kipakabellai pa'danga battu ri nyawaku, Kipasalamaka' battu ri pangngokko'na kongkonga.

²²Tena pakkulleku, Kilappassanga' battu ri tanru'na tedong romanga siagang muncenna singaya.

²³ Lakucaritai sikamma gautTa mae ri sikamma sari'battangku; lalang ri passirapakkanna ummatTa mammuji-mujia' ri Katte.

²⁴Iami puji, he, sikamma tau mappilangngeria! Iami pakalompo, ikau sikontu turunganna Yakub! Su'jukko ri Ia, ikau sikontu turunganna Israel!

²⁵Saba' tena Nacini' tunai tau nijallakkanga, natena Nabawang-bawangngangi kasessanna. Tena Nala'boko battu ri anjo taua, mingka napilangngeri punna appala' tulungi mae ri Ia.

²⁶Ri tangnga-tangngana passe'reanna ummaka mammujia' mae ri Katte, lanri sikontu apa le'baka Kigaukang. Ri dallekang umma' mappilangngeria kupassareang koro'bang le'baka kupa'janjiang.

²⁷Tu kasi-asia langnganrei sa'genna bassoro'; tau battua mae ri Batara lamammuji ri Ia. Poro salewangang ngasengko sa'genna satunggu-tungguna!

²⁸Sikontu bansaya langngu'rangi ri Batara nampa ammotere' mae ri Ia, sikontu suku bansaya lasu'juki anynyomba mae ri Ia.

²⁹Nasaba' Batarayami makoasa, Ia ammarenta mae ri bansa-bansaya.

³⁰Sikontu tau malompoa lasu'juki ri dallekanNa, sikontu rupatau tattallasa' satunggua lanynyombai mae ri Ia.

³¹Sikamma turungang ri bokoa lanynyombai ri Batara, lanibirittakangi sa'genna sikamma turungang ri bokoa.

³²Ri bansa lassuka ri boko lanikabarrangi angkanaya Batara ampasalamaki umma'Na.