Read Makassar Version – KITTA' MATANGKASA PAMMUJI 27 Bible Online

PAMMUJI 27 - Makassar Version – KITTA' MATANGKASA bible

PAMMUJI 27

¹Pammujina Daud. Batarami caya singarakku siagang kasalamakkangku, tena lakukamallakkang. Batara tampa' pa'la'langangku, tena kulamalla'.

²Punna nibakkaia' ri tu ja'dala' eroka ambunoa', ke'nanga latatto'ro na tu'guru'.

³Manna kunikatulung ri pasukang lompoa, tena kulamalla'. Manna nakajariang bunduka angngewa', tuli manrannuangku.

⁴Se'reji bawang kupala' ri Batara, iajinne bawang kukaerokia: ammantanga lalang ri Balla'Na Batara lalang sikontu umurukku, untu' angkasiaki kabajikanNa Batara siagang appala' panrurunNa.

⁵Najagaia' Batara ri wattungku lalang kasukkarang; Nacokkoa' lalang ri Balla'Na, na Naangkaka' nai' ri moncong batua.

⁶Anne kamma ammetama' mae ri musungku niaka angkatulunga'; jari makkio' rannuma' assare koro'bang sukkuru' ri BallatTa; erokka' akkelong siagang mammuji mae ri Batara.

⁷O, Batara, pilangngeria' punna akkioka' mae ri Katte, kamaseanga' siagang Kipialima'!

⁸Kikana, “Battuko mae anynyomba ri Nakke.” Appialima' kukana, “Lintakka' battu, o, Batara;

⁹teaKi' accokkoi battu ri nakke.” TeaKi' larroi siagang teaKi' tollaki atanTa, saba' iKattemi le'ba' antulunga'. TeaKi' pelakkia' yareka teaKi' bokoia', o, Allata'ala, Tumappasalamakku.

¹⁰Manna kunibokoi ri anrong manggeku, Allata'ala tuli lamparakaia'.

¹¹Kipicinikianga' apa Kikaerokia, o, Batara, rurunganga' mange ri oloang lambusuka, saba' tamaka jaina musungku.

¹²TeaKi' passareangia' mae ri hawa napasuna balingku, ambakkaia' siagang balle-balle na panggaratta'.

¹³Tappaka' angkana lakukasiaki kabajikanNa Batara lalang tallasakku ri anne linoa.

¹⁴Manrannuangko mae ri Batara, gassingi siagang pakajarreki pa'mai'nu; manrannuangko mae ri Batara!