Read Makassar Version – KITTA' MATANGKASA PAMMUJI 28 Bible Online

PAMMUJI 28 - Makassar Version – KITTA' MATANGKASA bible

PAMMUJI 28

¹Pammujina Daud. O, Batara, makkioka' mae ri Katte, iKattemi Tumappatojengku, pilangngerimi pakkiokku. Punna tamakkana-kanayaKi' mae ri nakke, sanrapanga' tau naunga ri kali'bong kuburuka.

²Pilangngeri pappalakku punna akkioka' appala' tulung, Kiangkaki limangku mae ri Balla' matangkasatTa.

³Teaki' tumpassia' assama siagang tu dorakaya, siagang tu a'gau' ja'dalaka. Sanna' sombere'na kana-kananna ke'nanga, mingka atinna lalang teai sipato' botto'na.

⁴ Hukkung laloi ke'nanga lanri panggaukanna ke'nanga, lanri kaja'dallang nagaukanga ke'nanga. Hukkung laloi ke'nanga situru' panggaukanna ke'nanga; hukkungi ke'nanga simbattala' panggaukanna ke'nanga.

⁵Tanajampangiai ke'nanga panggaukanNa Batara, yareka apa le'baka Nagaukang. Jari lanihukkummi ke'nanga ri Batara, siagang laniposso'mi ke'nanga sa'genna satunggu-tungguna.

⁶Nipujimi Batara, saba' Napilangngerimi pappalakku.

⁷Batara pa'la'langangku siagang Tumappatojengku, tappaka' mae ri Ia. Natulunga' siagang Napakarannui pa'maikku, mammujia' mae ri Ia siagang lagu sukkuru'.

⁸Batara Nasarei kagassingang umma'Na, Napattojengi siagang Napasalamaki karaeng nipileNa.

⁹Kipasalama' laloi ummatTa, o, Batara, barakkaki sikamma tau Kipatanga. A'jariKi' sanrapang pakalawaki mae ri ke'nanga, na Kijagai ke'nanga sa'genna satunggu-tungguna.