Read Makassar Version – KITTA' MATANGKASA PAMMUJI 34 Bible Online

PAMMUJI 34 - Makassar Version – KITTA' MATANGKASA bible

PAMMUJI 34

¹ Pammujina Daud, ri wattunna assara-sarai tasilolongang pikkiranna ri dallekanna Abimelekh, sa'genna nibongka a'lampa.

²Erokka' appala' sukkuru' ri Batara lalang sikontu wattua, tena ammariku mammuji-muji mae ri Ia.

³Erokka' a'lompo-lompo pa'mai' lanri gau'Na Batara; poro Nalangngereki tu nijallakkanga na'jari rannu.

⁴Malompoi Batara niaka anrurunganga', umba kissama-sama ampakala'biriki arenNa.

⁵Appala' doanga' ri Batara, nampa appialimo, na Nalappassanga' battu ri kamallakkanga.

⁶Tu nijallakkanga manrannuangi ri Ia nampa a'jari rannumo, tenamo saba'na lasiri'-siri' ke'nanga.

⁷Tu cilakaya akkioki siagang appialimi Batara, nilappassammi battu ri sikontu kasukkarranna.

⁸Malaeka'Na Batara anjagai tau mappilangngeria, siagang nalappassang ke'nanga battu ri bahayaya.

⁹ Kasia'mi kalennu antekamma baji'Na Batara, mate'nei tau ma'la'langa mae ri Ia.

¹⁰Pakala'biriki Batara, he ikau ngaseng umma'Na, nasaba' tena nalakakurangang tu mappilangngeria.

¹¹Cipuru' tommi singa-singaya lanri kakurangang ri kanre; mingka tau anynyombaya ri Batara tena nakakurangang.

¹²Pilangngerimi, he ikau ana'-anaka ngaseng, kuajarakko mappakala'biri' mae ri Batara.

¹³ Erokko la'bu umuru'nu siagang angkasiaki bajika?

¹⁴Teako appasuluki kana-kana ja'dala', siagang teako nungai akkala' annipua.

¹⁵Pakabellai kalennu battu ri ja'dalaka, gaukangi bajika, usahakangi passiamakkanga sipikulle-kullenu.

¹⁶Naparhatikangi Batara tu bajika, Napilangngeri ke'nanga punna akkio' appala' tulung

¹⁷Mingka Nabaliangi tu a'gau' ja'dalaka; punna mate ke'nanga, lintaki nikaluppai.

¹⁸Punna akkio' tu bajika, nipilangngeri ri Batara, na nipasalama' ke'nanga battu ri kasukkarranga.

¹⁹Ma'reppeseki Batara mae ri tu ca'dia pa'mai'na; Napasalamaki tu tappu' minasaya.

²⁰Jai pa'risi'na tu bajika, mingka nilappassangi ri Batara battu ri yangasenna anjo.

²¹ Tuli nijagai batangkalenna ri Batara, manna sipappa' bukunna talanitepokai.

²²Tu ja'dalaka lamatei lanri kaja'dallanna, tu birisika mae ri tu bajika lanihukkungi.

²³Napasalamaki Batara sikamma atanNa; ia ma'la'langa mae ri KalenNa talanihukkungai.