Read Makassar Version – KITTA' MATANGKASA PAMMUJI 35 Bible Online

PAMMUJI 35 - Makassar Version – KITTA' MATANGKASA bible

PAMMUJI 35

¹Pammujina Daud. O, Batara, Kiewai tau angngewaya', Kibunduki tau ambundukia'.

²Kiallei pa'lapa' barambanTa, siagang ammenteng maKi' antulunga'.

³Angkaki paccokaTa siagang pokeTa nampa Kiewa tau angngondangia'. Kipaumi ri nakke angkana iKatte Tumappasalamakku.

⁴Boli'mi kamma tau eroka ambunoa' nibeta na nipakasiri'. Boli'mi kamma tau assikongkoloka ambalianga' ammunduru' siagang lingu.

⁵Boli'mi kamma niondang ke'nanga ri malaeka'Na Batara, sanrapang awang nipasiara' ri anging.

⁶Boli'mi kamma niondang ke'nanga ri malaeka'Na Batara, ri oloang sassanga siagang laccuka.

⁷Sia-siaji ke'nanga attannang sikko' untu' inakke yareka angngeke kali'bong untu' anjakkalaka'.

⁸Boli'mi kamma ke'nanga nituju ri posso' tena nasanna-sannai ke'nanga. Boli'mi kamma nijakkala' ke'nanga ri sikko' napareka kalenna nampa tu'guru' na posso'.

⁹Kumakkio' ma'rannu-rannu lanri Batara, rannui pa'maikku lanri Ia ampasalamakka'.

¹⁰Nakanamo sikontu pa'maikku, “O, Batara, tena sanrapanTa! Kilappassangi tau lammaya battu ri tau gassinga, tu kasi-asia siagang tu pa'risika battu ri tumanjallakkanna.”

¹¹Sa'bi-sa'bi ja'dalaka ambangungi ambalianga', siagang natudua' anggaukangi apa-apa tenaya kuassengi.

¹²KabajikanTa nabalasaki kaja'dallang; tallanga' lalang ri tappu' minasaku.

¹³Ri wattunna garring ke'nanga, si'nai pa'maikku kutangnganrea; appala' doanga', kupadundu ulungku,

¹⁴sanrapang tau ampappala' doangangi sari'battanna yareka ampappala' doangangi bela baji'na. Andundua', angkarruki ke'nanga, sanrapang tukamateanga' ri amma' kalengku.

¹⁵Mingka ri wattungku susa, sannangi pa'mai'na ke'nanga, siagang a'rappungammi ambalianga'. A'jappa keppang-keppangi ke'nanga untu' ancau-caua'.

¹⁶Tena nammari-mari ke'nanga ancau-caua', siagang birisi' sikali ancinikia'.

¹⁷Sa'genna kemae wattu, o, Batara, sa'genna kemae wattu, Kicini'-cinikija' bawang? Kipasalama' laloa' battu ri pa'bakkana ke'nanga, Kipasalamaki nyawaku battu ri anjo singa-singaya.

¹⁸Nakulappala' sukkuru' mae ri Katte ri tangngana ummatTa, siagang kupuji arenTa lalang ri pa'rappunganna ke'nanga.

¹⁹ TeaKi' balang parekangia' nipare' karek-karenang ri tau ambalianga' natena saba'na. TeaKi' balang parekangia' nigorai ri tau birisika ri nakke natena saba'na.

²⁰Tasomberai bicaranna ke'nanga; a'rancanai ke'nanga ero' annipu mae ri tau siamaka lalang tallasa'na.

²¹Ammarrang-marrangi ke'nanga mae ri nakke angkana nacini'mi ke'nanga apa le'baka kugaukang.

²²Mingka iKatte, O, Batara, le'ba' anciniki; teaKi' a'mereki, o, Batara, teaKi' bellai battu ri nakke.

²³Ammenteng maKi' naKipattojenga' ri parkaraku, o, Allata'alaku siagang Bataraku, Kitulung laloa'!

²⁴Pattojenga', saba' adelekKi', o, Batara Allata'alaku, teaKi' lappassangngi musua anggoraia'.

²⁵TeaKi' lappassangngi ke'nanga angkana ri pa'mai'na, “Sukkuru' maki', kale'ba'mi nipattaena nyawana. A'jarimi pattujunta!”

²⁶Boli'mi kamma tau sannanga anciniki pa'risikku a'jari lingu siagang a'jari siri'-siri'. Boli'mi kamma tau napattampoanga kalenna mae ri nakke nihina siagang nipakasiri'.

²⁷Poro tu eroka ancinikka' nipattojeng akkio' rannu siagang ma'reja-reja. Poro a'mole-molei ke'nanga angkana, “Malompo tojenna Batara! Nakaerokangi kasalamakkanna atanNa!”

²⁸Na lakukabarrang kaadelanTa, siagang kumammuji ri Katte sila'busu' allo.