Read Makassar Version – KITTA' MATANGKASA PAMMUJI 37 Bible Online

PAMMUJI 37 - Makassar Version – KITTA' MATANGKASA bible

PAMMUJI 37

¹Battu ri Daud. Teako lussakki lanri tu ja'dalaka, teako angngiri matai mae ri tu a'gau' salaya.

²Saba' tasalloa nalanynya' ke'nanga sanrapang ruku', nakalumeng sanrapang lamung-lamung moncongbuloa.

³Tappakko ri Batara, siagang gaukangi bajika, ammantang mako ri anjo pa'rasanganga siagang teako amminrai.

⁴Boyai mate'nea ri Batara, Iami lampassukkukko ri nakaerokia pa'mai'nu.

⁵Passareangi tallasa'nu mae ri Batara, manrannuangko ri Ia, Iami lantulungko.

⁶Ia lampa'nyatai tamamminranu sanrapang singaraka, siagang kalambusannu sanrapang alloa.

⁷Pakasannangi pa'mai'nu antayangi Batara, sa'barakko antayangi sa'genna angngalle tindakang. Teako lussakki lanri baji'na nucini' tallasa'na taua, yareka tau anggaukangai balle-ballea.

⁸Teako larroi siagang teako bambangi nyawanu, anjo cilakaji bawang naerang.

⁹Saba' lanipa'lanynyaki tau a'gau' ja'dalaka, mingka tu manrannuanga ri Batara lanawarisiki anjo buttaya.

¹⁰Tau ja'dalaka lanipa'lanynyaki linta', taenami, punna niboyai.

¹¹ Tau tuna pa'maika lanawarisiki anjo buttaya, na nakasia' kacoppongang alla'bia.

¹²Tu ja'dalaka a'rancanai kaja'dallang mae ri tu bajika, na birisi' ke'nanga anciniki.

¹³Mingka nikakkali ri Batara tu ja'dalaka, saba' Naassengi angkana a'reppese'mi kale'bakkanna.

¹⁴Nabi'buki pa'danna siagang napatabai ana' panana untu' ambunoi tu kasi-asia siagang tu pa'risika, untu' ansamballei tu bajika ri katallassanna.

¹⁵Mingka tu ja'dalaka lanicokai ri pa'dang kalenna, lanitepoki anrong panana ke'nanga.

¹⁶Apa sike'de' napatanga tu bajika lompoangangi anggaranna nakala'bianna tu ja'dalaka.

¹⁷Saba' lanitepoki koasana tu ja'dalaka ri Batara, mingka tu bajika laNajagai.

¹⁸Najagai Batara katallassanna tu bajika, barang pisakana ke'nanga sa'genna satunggu-tungguna.

¹⁹Ri wattu kasukkarranna tena nalasusa ke'nanga, ri wattu kacipuranga lagannaki kaparalluanna ke'nanga.

²⁰Mingka tu ja'dalaka lapossoki, musunNa Batara lalanynyaki sanrapang bunga ri paranga, lalanynyaki ke'nanga lalang umbua.

²¹Tu ja'dalaka angnginrangi na tanapoterangnga, mingka tau bajika lammoro' pa'maiki assare.

²²Tu nibarakkakia ri Batara lanawarisiki anjo buttaya, mingka laNabongkai tu Natunraya.

²³Narenrengi Batara taua ri oloang mustia naolo, Napakajarreki tau Napangngellaia ri tallasa'na.

²⁴Punna tu'guru' tena nalasanna' bokka'na nasaba' nita'galaki limanna ri Batara.

²⁵Pakkaramula ri rungkaku sa'gengku toa, tale'bakai kucini' tau bajika nibokoi ri Batara, yareka a'jari papala'-palaki ana' cucunna.

²⁶Tuli appappinrangi siagang assarei, na'jari barakka' ana'-ana'na mae ri kalenna.

²⁷Bokoi kaja'dallanga, gaukangi bajika, na untu' satunggu-tungguna napammantangngi turungannu anjo buttaya.

²⁸Saba' Nangai Batara panggaukang bajika siagang adeleka, tena Nabalang parekangi ta'ronang tau majarreka ri Ia. Najagai ke'nanga satunggu-tungguna, mingka natumpasaki turunganna tu ja'dalaka.

²⁹Tu bajika nawarisiki anjo buttaya, na napammantangngi satunggu-tungguna.

³⁰Tu bajika a'bicarai siagang annaba, tuli lambusuki kana-kananna.

³¹Naparipa'maiki hukkunNa Allata'ala, tena nadakkai anjo hukkunga.

³²Tu bajika niodoki ri tu ja'dalaka a'boyai kasampatang untu' ambunoi.

³³Mingka tena nilappassangi tu'guru' ri limanna musua, yareka nihukkung wattunna niadeli.

³⁴Manrannuangko ri Batara siagang turuki parentaNa, na Naangkakko untu' a'jari warisi' ri anjo buttaya; lanuciniki nipa'lanynya' tu ja'dalaka.

³⁵Le'baka' accini' tu ja'dala' na nangai borro pauna; sanrapangi poko' coppong siagang lantang aka'na.

³⁶Wattu allaloku pole, tenami kucini', kuboyai, mingka tenami kugappa.

³⁷Parhatikangi tau bajika siagang tau lambusu' pa'maika; tau nangaia assiama' bajiki allo ri bokona.

³⁸Mingka tau dorakaya lanipossoki; turunganna ke'nanga lanipa'lanynyaki.

³⁹Napasalamaki Batara tau bajika, Najagai ke'nanga ri wattu kasukkarranna.

⁴⁰Natulungi siagang Napasalamaki ke'nanga, Nalappassangi ke'nanga battu ri tu ja'dalaka, saba' a'la'langi ke'nanga mae ri Ia.