Read Makassar Version – KITTA' MATANGKASA PAMMUJI 41 Bible Online

PAMMUJI 41 - Makassar Version – KITTA' MATANGKASA bible

PAMMUJI 41

¹Untu' pamimping pakelong. Pammujina Daud.

²Mate'nei tau amparhatikangai tau lammaya; lanitulungi ri Batara ri wattu kasukkarrang.

³Lanijagai siagang laniparakai ri Batara, lanipakate'nei ri lino, siagang tena nipassareangi mae ri limanna musunna.

⁴Lanitulungi ri Batara ri wattunna garring, siagang lanipammollei ammotere' ri garrinna.

⁵Kukana, “Dorakama' mae ri Katte, o, Batara, kamaseanga' siagang Kipammollea' ri garringku.”

⁶Nacarita tau ja'dalaka' musungku, nakellaia' mate ke'nanga na kunikaluppai.

⁷Sikamma tau battua antoaka' tena natulusu' pa'mai'na. Napa'rappungamma' ke'nanga kabara' kodi, nampa napa'la'bang kemae-kemae.

⁸Assibici'-bici' ngasemmi tau birisika ri nakke; nacarita sanna'ma' kodiku ke'nanga.

⁹Nakana ke'nanga, “Teai sipato' sanna'na garrinna, tena olona lakkulle ambangung poleang.”

¹⁰ Ba'lalo manna bela bajikku kaminang kupatappaka, tau kuaganga sipangnganreang, nahina tomma'.

¹¹Kamaseang laloa', o, Batara, Kipammolle laloa' ri garringku, sollanna kukkulle ambalasaki kaja'dallanna sikamma balingku.

¹²Punna tena nabeta' musungku, kuassemmi angkanaya mangngellaiKi' ri nakke.

¹³Kitulunga' lanri kalambusangku, siagang Kipa'jaria' attallasa' siagang iKatte sa'genna satunggu-tungguna.

¹⁴ Nipujimi Batara, Allata'alana Israel! Mammujiko ri Ia kamma-kamma anne sa'genna satunggu-tungguna! Jarimi anjo kammaya. Aming!