Read Makassar Version – KITTA' MATANGKASA PAMMUJI 45 Bible Online

PAMMUJI 45 - Makassar Version – KITTA' MATANGKASA bible

PAMMUJI 45

¹Pammujina golongang Korah. Kelong mangngamaseang. Untu' pamimping pakelong. Situru' lagu: Bunga bakung.

²Kana-kana bajika assulu' tojemmi battu ri atingku, kupangngadakkangi kelongku mae ri karaenga. Sanrapang pulpenna se'rea tucara'de' annulisi', sadiai lilaku appau kana-kana baji'.

³Ikaumi kaminang gammara' ri alla'na sikontu rupataua, kana-kanannu rassi kabajikang, lanri kammana minjo naNabarakkakiko Allata'ala sa'genna satunggu-tungguna.

⁴Sele'mi pa'dannu ri aya'nu, he ikau karaeng barania, sanna' malomponu siagang accayanu!

⁵Maju mako siagang gammara' mange ri kalompoanga parjuangkangi katojenganga siagang kaadelang bajika; re'bu'mi pammetang lompoa siagang kagassingannu!

⁶Ana' pana cidu'nu natarrusuki atenna musunta, tu'guruki bansa-bansaya ri dallekanna bangkennu.

⁷ Nasareko koasa Allata'ala untu' ammarenta, attahangi koasanu satunggu-tungguna; ammarentako' siagang adele' mae ri ra'ya'nu.

⁸Nungai katojenganga siagang nukabirisi kaja'dallanga; lanri kammana, Allata'ala, Allata'alata Napile mako, siagang Napakate'ne mako la'biangang na karaeng maraenga.

⁹Pakeannu mabau' a'rasa muru', gaharu siagang cendana; nipakarannuko ri pakarena musika ri balla' lompo gadinga.

¹⁰Ri alla'na dayang-dayang balla' lompoa nia' ana'-ana' tulolonna karaeng. Ri sa'ri kanang empoang kala'biranga ammentengi bainenna karaeng ammake belo-belo bulaeng ti'no'.

¹¹He, Tulolo, pilangngeri kana-kanangku, kaluppaimi bansanu siagang bija pammanakannu.

¹²Kaga'gannu angkontaki karaenga, ia karaennu, tundu' mako mae ri ia.

¹³Pandudu'na Tirus angngerangi passare mae ri kau; tu kalumanynyanga ero'mi naboya pa'mai'nu.

¹⁴Antama'mi baine karaeng sanna' accayana, ro'na nisulang bulaeng.

¹⁵Nirurungang ri tujai mange ri karaeng, sangka' rupa cura'na pakeanna, nirurungang ri sikamma tulolo, bela-belana, ke'nanga pole untu' karaeng.

¹⁶Akkio' rannumi ke'nanga ma'reja-reja ri wattu niantara'na antama' ri balla' lompona karaenga!

¹⁷Ikau, karaengku, langgappako jai ana' bura'ne untu' angngempoi empoang kala'biranna boe-boeta. Nupa'jari ke'nanga tau koasa mae ri sikontu linoa.

¹⁸Iaminne lagua kupake kupa'la'bang namasahoro' arennu sa'genna sikamma turungannu bansa-bansaya lanapujiko satunggu-tungguna.