Read Makassar Version – KITTA' MATANGKASA PAMMUJI 46 Bible Online

PAMMUJI 46 - Makassar Version – KITTA' MATANGKASA bible

PAMMUJI 46

¹Pammujina golongang Korah. Untu' pamimpin pakelong. Lagu Alamot.

²Allata'ala pa'la'langangku siagang kagassingangku; tuli sadiai siagang akkullei antulunga' lalang kasukkarang.

³Talamallaka maki', manna pole ta'goccang linoa, siagang tallang sikamma monconga naung ri tamparanga;

⁴manna na'jallo' tamparanga siagang bombang lompo, nannekkere' bulu'-buluka natunrung.

⁵Nia' lo'lorang je'ne' binanga ampakarannui KotaNa Allata'ala, tampa' pammantanganNa Allata'ala Kaminang Tinggia.

⁶Ammantangi Allata'ala anjoreng, jari talapossokami anjo kotaya; laNatulungi ri wattu ammumbana alloa.

⁷A'gunturu'mi Allata'ala, na ancuru' taba sikali linoa; gegere'mi bansa-bansaya, runtummi sikamma karaenga.

⁸Batara Kaminang Makoasa anrurungangki', Allata'alana Yakub anjagaiki'.

⁹Umba, ciniki apa le'baka Nagaukang Batara; tamaka lompona bate pare'Na ri lino!

¹⁰Napammari pa'bundukanga ri sikontu linoa, anrong panaya siagang pokea Naancuruki, pa'lapa' a'bundalaka untu' batangkalea Natunui.

¹¹Nakana, “Pammari a'bunduka; assengi, angkana iNakke anne Allata'ala, iNakke malompo ri alla'na bansa-bansaya, malompo ri sikontu linoa.”

¹²Batara Kaminang Makoasaya anrurungangki', Allata'alana Yakub anjagaiki'.