Read Makassar Version – KITTA' MATANGKASA PAMMUJI 5 Bible Online

PAMMUJI 5 - Makassar Version – KITTA' MATANGKASA bible

PAMMUJI 5

¹Untu' pamimping pakelonga. Nirurungangi ri suling. Pammujina Daud.

²O, Batara, Kipilangngeri kana-kanangku, Kiparhatikangi kunrarengku.

³Kijampangi pakkiokku na Kitulunga', o Karaengku siagang Allata'alaku.

⁴Saba' ri Kattema' appala' doang, o Batara, Kipilangngeri pakkiokku ri wattu bari'basa'na. Bari'basa' nakuerang passareku nakutayang pappialinTa, o Batara.

⁵IKatte Allata'ala tamangngaia ri kaja'dallang; tamakkulleai battu tuja'dalaka mae ri Katte.

⁶TaKitahangngai anciniki tau tampoa, Kikabirisi tau ma'gau' ja'dalaka.

⁷Kipossoki tu nangaia a'balle-balle, Kicini' irawai patipua siagang pabuno-bunoa.

⁸Mingka lanri lompona pangngamaseanTa, kukkulle antama ri Balla' SambayanTa. Kusu'ju mange ri Balla' Sambayang matangkasatTa, nakusombaKi' ri pa'mai' mailalang.

⁹O, Batara, tamaka jaina musungku! Renrenga' untu' anggaukangi erotTa, naKipicinikianga' oloang mustia kuolo.

¹⁰ Saba' kana-kananna musungku takkulleai nipatappa'; sangnging rancana ja'dala' rassi ri atinna ke'nanga. Angngontaki kana-kana mate'nena ke'nanga, mingka atinna ke'nanga rassi apa-apa botto'.

¹¹Hukkungi ke'nanga, o Allata'ala, lappassammi cilaka lanri rancanana tonji. Bongkai ke'nanga lanri jaina dosana, saba' angngewami ke'nanga mae ri Katte.

¹²Poro rannu pa'mai' ngaseng tu ma'la'langa ri Katte na tuli ma'reja-reja satunggu-tungguna. La'langi sikamma tu mangngaia ri Katte, sollanna rannu ke'nanga lanri iKatte.

¹³Saba' Kibarakkaki tu majarreka ri Katte, Kila'langi ke'nanga lalang pangngamaseanTa.