Read Makassar Version – KITTA' MATANGKASA PAMMUJI 51 Bible Online

PAMMUJI 51 - Makassar Version – KITTA' MATANGKASA bible

PAMMUJI 51

¹Untu' pamimpin pakelong. Pammuji natulisika Daud

² ri le'ba'na nipakainga' ri Na'bi Natan lanri a'gau' salimara'na siagang Batsyeba.

³Kikamaseanga' o, Allata'ala, lanri tuli mangngamaseanTa, Kilu'lu'mi dosaku lanri pangngamaseang lompoTa.

⁴Kibissai sikontu kaja'dallangku; Kitangkasia' battu ri dosaku.

⁵Saba' kuakui sikamma kasalangku, tuli kuu'ranginna dosaku.

⁶ Mae ri Katte, mae ri Katte bawang kudoraka, kugaukang apa Kikanaya ja'dala'. Jari siratang memang tongi punna Kihukkunga', adeleki kaputusanTa.

⁷Sitojenna, ja'dala' memanga' baku' nilassukangku, nataba memamma' dosa baku' lalangku ri battang.

⁸Kituntuka' situlusu' atinTa; Kipirassimi atingku siagang pangngassenganTa.

⁹Kitangkasia', sollangku a'jari tangkasa'; bissaia', sollangku a'jari kebo' sanrapang kapasa'.

¹⁰Boli'mi kamma kulangngere' kabara' nikarannuanga, sollanna a'jari rannu poleang anne atingku le'baka Kiancuru'.

¹¹Kialleimi rupanTa battu ri dosa-dosaku, siagang lu'lu'mi sikontu kasalangku.

¹²Pa'jarianga' ati maci'nong untu' inakke, o, Allata'ala, Kiberui atingku siagang sumanga' sa'bara'.

¹³TeaKi' pelakkia' battu ri dallekanTa, teaKi' allei roh matangkasatTa battu ri nakke.

¹⁴Kipa'jari rannua' pole lanri kasalamakkang battua ri Katte, sarea' ati rella untu' mannuruki ri Katte.

¹⁵Nalakupangngajarrang parentaTa mae ri tau dorakaya, sollanna ammotere' ke'nanga mae ri Katte.

¹⁶Kilappassanga' battu ri kamateanga, o, Allata'ala Tumappasalamakku, nakurannumo angkabarrangi kaadelanTa.

¹⁷O, Batara, tulunga' a'bicara, nakulammuji-muji mae ri Katte.

¹⁸Tena Kiero' ri koro'bang nisamballea; ebara' angkana assarea' koro'bang nitunu, tena nalaKingai.

¹⁹Koro'bang untu' Allata'ala iamintu pa'mai' ancuruka, pa'mai' tunduka siagang tobaka tena naKitollaki.

²⁰O, Allata'ala, Kipappicinikangi kabajikanTa mae ri Sion, Kibangung laloi ammotere' tembo'-tembo' kalli'na Yerusalem.

²¹NaKilaero'mo antarimai koro'bang siratanga, koro'bang nitunua siagang koro'bang tenaya kuranna sapi laki lanikoro'bangkang irate ri tampa' pakkoro'bangnganTa.