Read Makassar Version – KITTA' MATANGKASA PAMMUJI 52 Bible Online

PAMMUJI 52 - Makassar Version – KITTA' MATANGKASA bible

PAMMUJI 52

¹Untu' pamimping pakelong. Kelong pangngajara'na Daud,

² ri wattunna battu Doëg, anjo tu Edom, mange ampauangi Saul angkana anrapi'mi Daud ri balla'na Abimelekh.

³He, tau kassaka, angngapa nupattampo-tampoang kaja'dallannu mae ri tau Nakamaseanga Allata'ala?

⁴Sila'busu' alloko annipu siagang anrancanakangi apa ja'dalaka; lilanu sanrapangi lading cukkuru' taranga.

⁵Ikau la'bi nungaiangngangi kaja'dallanga na kabajikanga, nungaiangngangi a'balle-ballea nakkana tojenga.

⁶Annipuko siagang kana-kanannu siagang nupa'risi pa'mai'na taua!

⁷Mingka ikau lanipossokko ri Allata'ala satunggu-tungguna; nijakkalakko siagang nire'resangko battu lalang ri balla'nu, siagang nipa'lanynyakko battu ri linona tau attallasaka.

⁸Nacini'na anjo kammaya, la'jari malla' ngasemmi tau bajika, nampa nakakkaliko na nakana,

⁹“Iaminjo tau tenaya naero' a'la'lang mae ri Allata'ala, mingka kakalumanynyangnganna alla'bia narannuang siagang a'boya amang ri barang narampasaka.”

¹⁰Mingka inakke sanrapanga' poko' zaitun moncongbuloa niaka lalang ri Balla'Na Allata'ala. Tappaka' angkana tuli mangngamaseangi Allata'ala sa'genna satunggu-tungguna.

¹¹Tulusu' erokka' appala' sukkuru' mae ri Katte ri dallekanna ummatTa kukabarrangi kabajikanTa.