Read Makassar Version – KITTA' MATANGKASA PAMMUJI 55 Bible Online

PAMMUJI 55 - Makassar Version – KITTA' MATANGKASA bible

PAMMUJI 55

¹Untu' pamimping pakelong. Nirurungang ri kacapi. Kelong pangngajara'na Daud.

²O, Allata'ala, Kipilangngeri pappala' doangku, teaKi' allei rupanTa battu ri pappalakku.

³Kiparhatikanga' siagang kipialia', ancuruka' lanri kasusaangku.

⁴Lussaki pa'maikku lanri pa'garatta'na musua siagang panjallakkanna tau ja'dalaka. Saba' nasusai ke'nanga tallasakku, siagang larroi ke'nanga ammusua'.

⁵Sanna' lussa'na pa'maikku, nipakamallaka' ri karama'na kamateanga.

⁶Nikalimbukia' ri kamallakkang siagang pannekkerang, nijallakkanga' ri pakkasia' malla' dudua.

⁷Uh, ebara' angkana akka'nyika' sangkamma jangang-jangang bodobangkeng, lanri'baka' mange a'boya tampa' sannang.

⁸Iye', lanri'baka' bella sikali, na kuammantang ri parang luaraka.

⁹Lapparurua' a'boya tampa' pa'la'langngang battu ri anging puttusuka siagang anging lompoa.

¹⁰O, Batara, Kipa'lingu laloi musu-musungku, Kikacoi bicaranna ke'nanga, saba' ri kotaya kuciniki katerassanga siagang passiba'jianga.

¹¹Allo bangngi a'jappa ke'nanga akkuliling, anggaukangi kaja'dallanga siagang appare' karicuang.

¹²Kemae-kemae nia' pangngancurang; panjallakkanga siagang pannipuanga a'la'bangi ri pasaraka.

¹³Ebara' angkana nacalla' musungku, akkulle ija' attahang. Ebara' angkana nahina' balingku, akkulle ija' ampaccokkoangi.

¹⁴Mingka ba'lalo ikau, belaku, sahabakku, bela ma'reppesekku a'giling ambalianga'.

¹⁵Riolo sileporangki' siagang baji', biasaki' siagang assambayang ri Balla'Na Batara.

¹⁶Boli'mi kamma namate silalonna musungku na naung attallasa' ri linona tau matea, saba' kaja'dallanna niaki ri balla'na ke'nanga, ri tangnga-tangngana ke'nanga.

¹⁷Mingka akkioka' mae ri Allata'ala, Batara lampasalamakka'.

¹⁸Allo bangngia' akkunrareng siagang angngarru', na Napilangngeri sa'rangku.

¹⁹Napasalamaka' battu ri pa'bakkana musua, sannaka jaina battu ambalianga'.

²⁰Allata'ala ammarentai battu ri satunggu-tungguna laNapilangngeria' siagang Nabetai ke'nanga. Saba' taerokai ke'nanga toba', siagang tamallakkai mae ri Allata'ala.

²¹Le'ba' belaku nabunduki agang-aganna, nakaluppai janjinna.

²²Kana-kananna baji' sikali manynyonyo', mingka atinna lalang sangnging kabirisang. Bicaranna lamma sikali, mingka anno'doki sanrapang pa'dang taranga.

²³Erangi sikontu ranggaselanu mae ri Batara, Iami lassareko kagassingang; saba' tena Nabalang parekangi tau lambusuka nibeta.

²⁴Mingka iKatte, o, Allata'ala, laKipanaungi ke'nanga antama' ri kali'bong sannaka lantanna. Sikamma patipua siagang appasolonga cera' talanarapikai bageruanna umuru'na ke'nanga. Mingka inakke tappaka' mae ri Katte.