Read Makassar Version – KITTA' MATANGKASA PAMMUJI 62 Bible Online

PAMMUJI 62 - Makassar Version – KITTA' MATANGKASA bible

PAMMUJI 62

¹Untu' pamimping pakelong. Situru' Yedutun. Pammujina Daud.

²Kupakasannangi nyawaku antayangi Allata'ala, battu ri Iaji bawang kasalamakkanga.

³Iaji bawang anjagaia' siagang ampasalamaka', Ia angngagangnganga', tena kulata'lengga.

⁴Sa'genna kere wattu ikau ngaseng ambakkai tau sanrapangamo rinring tattiling siagang tembo' la'biringamo rumbang?

⁵Ero' ngaseng jako bawang antu'gurangi battu ri empoang tinggina. Ikau ngaseng nungai a'balle-ballea; nangai assare barakka' bawanu, mingka attunrako lalang atinnu.

⁶Kupasannangi nyawaku antayangi Allata'ala, battu ri Iaji bawang kasalamakkangku.

⁷Iaji bawang anjagaia' siagang ampasalamaka'; Iaji angngagangnganga', tena kulata'lengga.

⁸Iami Allata'ala assarea' kasalamakkang siagang kalompoang, Iami pa'la'langangku siagang angngagangnganga' makassaka.

⁹He, bansaku, manrannuangko ri Allata'ala lalang sikontu wattunnu; pabattui ri Ia bonena atinnu, saba' Iami tampa' pa'la'langanta.

¹⁰Rupataua sanrapanji bawang sipa'maikang nappasa', lompo yareka ca'di para tena anggaranna. Punna nitimbangi, a'nassami angkana ringannaja ke'nanga, la'bi ringangi na sipa'maikanga nappasa'.

¹¹Teako manrannuangngi ri wassele' apa nipaccoka ri paranta tau, teako pattoangi barang nialle passaya. Ba'lalo punna katambang kakalumanynyangngannu, teako a'dakkiki nyawanu mae ri anjo.

¹²Pissiapammi kulangngere' Allata'ala angkana, anjo kakoasanga battu ri Ia,

¹³ angkanaya Ia tuli mangngamaseangi. IKatte, o, Batara, ambalasaki massing-massing taua situru' panggaukanna.