Read Makassar Version – KITTA' MATANGKASA PAMMUJI 64 Bible Online

PAMMUJI 64 - Makassar Version – KITTA' MATANGKASA bible

PAMMUJI 64

¹Untu' pamimping pakelong. Pammujina Daud.

²O, Allata'ala, Kipilangngeri pappala' doangku ri wattungku susa, pasalamaki nyawaku battu ri musu appakamallaka.

³Kijagai laloa' battu ri passikongkolanna tau dorakaya, battu ri rancana cara'de'na sikamma tau ja'dalaka.

⁴Napa'jari tarangi lilana ke'nanga sanrapang taranna pa'danga, nappasulu' kana-kana pallaka sanrapang ana' pana.

⁵Battu ri paccokkoanna ke'nanga appasiara' carita balle-balle, tena malla'na ke'nanga ampitinai tau tenaya nasala.

⁶Anna'gala' jarreki ke'nanga ri ero' ja'dala'na, appareki akkala' ke'nanga untu' attannang sikko'; nakana kapang ke'nanga tena tau anciniki ke'nanga.

⁷A'rancanai ke'nanga kaja'dallang, siagang nakana, “Appareki ikambe rancana sannaka porena”. Sanna' lantanna atinna siagang pa'mai'na rupataua, takkulleai nitappu.

⁸Mingka Napabuccuki panaNa Allata'ala mae ri ke'nanga, nati'ring loko'mo ke'nanga.

⁹Posso'mi ke'nanga lanri bicaranna tonji ke'nanga; yangaseng ancinikai ammenggong ngaseng ulunna.

¹⁰Nampa lamalla' ngasemmo taua; nanawa-nawai panggaukanNa Allata'ala na nakabarrang apa le'baka nacini' Nagaukang.

¹¹Na yangasenna tau bajika larannu ngasemmi lanri anjo apa le'baka Nagaukang Batara. Lama'la'lammi ke'nanga mae ri Ia; sikontu tau lambusuka lalompoi pa'mai'na.