Read Makassar Version – KITTA' MATANGKASA PAMMUJI 68 Bible Online

PAMMUJI 68 - Makassar Version – KITTA' MATANGKASA bible

PAMMUJI 68

¹Untu' pamimping pakelong. Pammujina Daud.

²Ammentemmi Allata'ala ampasisa'la'-sa'laki musunNa, tau birisika ri Ia larimi battu ri dallekanNa.

³Nibongkai ke'nanga a'lampa ri Allata'ala, sanrapang umbu nituika ri anging nampa lanynya'. Sanrapang liling assolong lalang pepe', kammaminjo lanynya'na tau ja'dalaka battu ri dallekanNa Allata'ala.

⁴Mingka tau bajika rannui siagang ma'reja-rejai, akkio' rannu-rannui ke'nanga ri dallekanNa Allata'ala.

⁵Makkelongko mae ri Allata'ala, pujimi arenNa, pasadiai agang lompoa labattua a'dongko' rammang. ArenNa Batara, assannang-sannang mako ri dallekanNa!

⁶Allata'ala niaka ammantang ri Balla' matangkasa'Na a'jari mangge mae ri ana' kukanga siagang angngagangngangi sikamma jandaya.

⁷Allata'ala assarei tampa' pammantangngang tau akkale-kalea; nalappassangi tau nitahanga sa'genna mate'ne ke'nanga. Mingka tu mangngewaya mae ri Batara musti ammantangi ri butta rosoka.

⁸O, Allata'ala, ri wattunna Kiulu ummatTa a'jappa allaloi parang kalotoroka,

⁹ annekkereki linoa, tattumpai bosia ri dallekanTa, lanri battuna Allata'alana Sinai, Allata'alana Israel.

¹⁰Allumpai Kipaturung bosia, nampa Kipa'jari baji' butta rosotTa.

¹¹Nampa ammantang ummatTa anjoreng; lalang kabajikanTa, o, Allata'ala, Kiparakai tu kasi-asia.

¹²Assarei kaputusang Batara, nampa sikamma bainea angngerang kabara':

¹³“Larimi sikamma karaeng-karaenga siagang pasukanna!” Lari ke'nanga sanrapang jangang-jangang bodobangkeng a'lampa anri'ba'. Sikamma bainea ri balla' a'bage-bage pera' siagang bulaeng nabokoia ke'nanga. Manna najai tena namminawang a'bundu', mingka ammetami umma'Na Allata'ala.

¹⁵Ri wattunna Napasimbung Kaminang Tinggia sikamma karaenga anjoreng, turummi bosia sangkammaya es batu battu ri Moncong Salmon.

¹⁶Moncong Basan Iami moncong heba', moncong jaia coppo'na.

¹⁷Angngapa nabattu ri anjo coppo' jainu akkimburu anciniki Bulu' Sion Napilea Allata'ala untu' a'jari pammantanganNa? Lammantangi Batara anjoreng sa'genna satunggu-tungguna.

¹⁸Appulo sa'bu kareta kassa' Napake ammumba Allata'ala siagang sanna' mala'biri'Na ri alla'na ke'nanga.

¹⁹ Naiki Batara ri tampa' tinggia; jai tunitahang Naerang. Annarimai passare battu ri alla'na rupataua ba'lalo battu ri alla'na tau mangngewaya ri Ia; sollanna ammantang ke'nanga assipammantangngang Karaeng Allata'ala.

²⁰Pujimi Batara, saba' Iami ampasalamakki'; allo-allona Napisang erangnganta.

²¹Allata'alata Iamintu Batara Mappasalamaka, Ia allappassangki' battu ri kamateanga.

²²Mattantu laNalicaki Allata'ala ulunna musunNa, sikamma tau tulusu' attallasaka lalang dosa.

²³Nakana Batara, “He umakKu, Kuerangi musunnu battu ri Basan Kuerangi ke'nanga ammotere' battu ri dapara'na tamparanga,

²⁴sollannu akkulle ambissai bangkennu siagang cera'na ke'nanga, na nilepa' ke'nanga ri sikamma kongkonnu sa'genna sukku'.”

²⁵Sikontu taua nacini'mi barisang lompo pammetanTa, o, Allata'ala, Allata'alaku, Karaengku, nirurungammi ri tau jai mange ri tampa' pammantangnganNa.

²⁶A'jappai ri dallekang sikamma pakelonga, ri bokona sikamma pakarena kacapia; ri tangngana sikamma tulolo patunrung rabanaya; kammaminne kelonna ke'nanga:

²⁷“Pujimi Allata'ala ri tangnga-tangngana pa'rappunganna umma'Na, pujimi Batara, he sikontu turunganna Yakub!”

²⁸Benyamin, suku kaminang ca'dia, a'jappa ri dallekang, nampa a'rurung-rurung sikamma pinggawana tu Yehuda ri bokona sikamma pinggawana tu Zebulon siagang Naftali.

²⁹Natuntuki Allata'ala kagassingannu; o, Allata'ala, pakajarreki apa le'baka Kigaukang mae ri kambe.

³⁰Sikamma karaenga angngerangi passare mae ri Katte ri BallatTa ri Yerusalem.

³¹Kiga'gara' laloi tu Mesir, anjo olo'-olo' sekkeka ri tangngana ruku' tinggia. Kikalarroi bansa-bansaya, pa'rappungang tedong romanga siagang ana'-ana'na, massing sionjo'-onjokanga untu' anggappa pera'. Napasimbungi Allata'ala bansa-bansa nangaia a'bundu'.

³²Sikamma tumalompona Mesir battui angngerang tambaga; tu Sudan apparri-parri angngerang passare mae ri Allata'ala.

³³Makkelongko mae ri Allata'ala, he sikamma kakaraengang, akkelongko lagu-lagu pammuji mae ri Batara,

³⁴mae ri Ia angngoloai alla' marioloa. Pilangngeri! Batara a'bicara, sa'ranNa a'galutturuki sanna' heba'na.

³⁵Akuimi koasaNa Allata'ala makkanaya nakamma ri Israel, koasaNa sa'genna langi'.

³⁶Tamaka appakalannasa'na Allata'alata wattunna assulu' battu ri tampa' pammantanganNa. Allata'alana Israel assarei koasa kagassingang umma'Na. Nipujimi Allata'ala!