Read Makassar Version – KITTA' MATANGKASA PAMMUJI 69 Bible Online

PAMMUJI 69 - Makassar Version – KITTA' MATANGKASA bible

PAMMUJI 69

¹Untu' pamimping pakelong. Situru' lagu: Bunga Bakung. Battu ri Daud.

²Pasalamaka', o, Allata'ala, saba' nai'mi je'neka sa'genna kallongku.

³Tappeccorokka' antama' ri je'ne' lantanga, tena pattuppuangku. Tallanga' ri je'ne' lantanga, nilo'lorang ri bombang manaika.

⁴Akkio'-kiokka' sa'gengku mangngang nakalotoro'mo karro'-karrokku. Paccemi matangku antayangi pannulunNa Allata'alaku.

⁵ Tau birisika ri nakke natena passabakkanna, la'bi jaiangngangi najaina uukku ri ulungku. Tau gassinga eroki angngancurukka'; nabakkaia' siagang napitina' ke'nanga. Napassa' ampoterangi barang-barang tenaya nakualle passa.

⁶O, Allata'ala, Kiassengi sikamma kasalangku tena nataccokko dosaku mae ri Katte.

⁷TeaKi' balang parekangia' appakasiri' mae ri tau manrannuanga ri Katte, o, Batara, Allata'ala Kaminang Koasaya. TeaKi' balang parekangia' angngerang paccalla mae ri sikamma tau anynyombaya mae ri Katte, o, Allata'alana Israel!

⁸Saba' lanri iKattemi nakunihina, lanri iKattemi nakunicalla.

⁹A'jaria' sanrapang bansa maraeng mae ri bija pammanakangku, sanrapang tau battu pantara' mae ri daengku na andikku.

¹⁰ Sanna' lompona sumangakku lanri mangngaiku ri BallatTa, paccau-cauna tau anghinayaKi' natujui kalengku.

¹¹Angngarruka' siagang appuasa', mingka nahina' ke'nanga.

¹²Ammakea' kaeng karung pammatei ri susaku, mingka napianderia' ke'nanga.

¹³A'jari carita' ri tampa' pa'rappunganna taua, kelong-kelong tunasa'ringa inakke napitabai.

¹⁴Mingka appala' doanga' mae ri Katte, o, Batara, o, Allata'ala, pialia' punna baji' wattua. Kitulung laloa' lanri pangngamaseang lompoTa siagang lanri tamamminraTa.

¹⁵TeaKi' balang parekangia' tallang lalang ri je'neka, pasalamaka' battu ri tau birisika ri nakke siagang battu ri je'ne' lantanga.

¹⁶TeaKi' balang parekangia' nilo'lorang ri bombang manaika, siagang tallang ri dapara'na tamparanga yareka ri kuburu' lantanga.

¹⁷Kipialima', o, Batara, saba' iKatte bajikKi' siagang tuli mangngamaseangKi'. Poro assaile laloKi' mae ri nakke lanri lompona pangngarimangnginTa

¹⁸TeaKi' accokkoi battu ri anne atanTa, saba' natujua' kasusaang, karo-karo maKi' antulunga'.

¹⁹Battu lalo maKi' ampasalamaka', Kilappassanga' battu ri musu-musungku.

²⁰Kiassengi antekamma bateku nicalla, nihina siagang nipakkanai, Kicini' ngasengi sikontu musungku.

²¹Tappu' minasama' napakamma nihina, tenamo sumangakku. A'boya' pa'rikongang, mingka sia-siaji, a'boya' panynyaleori, mingka tena kunggappa.

²² Ba'lalo nisarema' kanre racung; wattungku turere, nisarea' angnginung cukka.

²³ Boli'mi kamma angngerang cilaka parjamuanna ke'nanga, na a'jari sikko' mae ri sikamma toananna ke'nanga.

²⁴Boli'mi kamma a'jari buta matanna ke'nanga na tuli lamma dongko'na ke'nanga.

²⁵Kitumpami pangngalarroinTa mae ri ke'nanga, boli'mi kamma nituju ke'nanga ri rinrana pangngalarroinTa.

²⁶ Boli'mi kamma a'jari sino sikali kemana ke'nanga, siagang tenamo bonena kema-kemana ke'nanga.

²⁷Saba' nasessai ke'nanga tau Kihukkunga, na nacarita sikamma tau nisessaya.

²⁸Boli'mi kamma pila' katambang kasalanna ke'nanga; teaKi' pattojengi ke'nanga.

²⁹ Boli'mi kamma nilu'lu' arenna ke'nanga battu ri kitta' katallassanga; na tena nicataki arenna lalang ri dattara'na tau lambusuka.

³⁰Mingka inakke nijallakkanga na kupa'risi', Kiangka' laloa' o, Allata'ala, siagang pasalamaka'.

³¹Kulamammuji mae ri Allata'ala siagang kelong-kelong, kupakalompoi lalang kelong-kelong appala' sukkuru'.

³²Anjo la'bi Natarimai Batara nakoro'bang sapia, koro'bang sapi laki lompoa.

³³Nacini'na kammaya anjo, rannumi tau nijallakkanga, lompomi pa'mai'na tau anynyombaya ri Allata'ala.

³⁴Saba' Napilangngeri Batara tu kasi-asia; tena nabalang parekangi umma'Na lalang ri tarungkua.

³⁵Pujimi Allata'ala, he langika siagang linoa, tamparanga siagang sikontu apa-apa niaka ilalanna.

³⁶Ia lampasalamaki Yerusalem siagang ambangungi ammotere' kota-kotana Yehuda. Lammantangi umma'Na Batara anjoreng; a'jari napatangi ke'nanga anjo buttaya.

³⁷Lanawarisiki ana' cucunna; lanapammantangngi tau mangngaia ri Batara.