Read Makassar Version – KITTA' MATANGKASA PAMMUJI 71 Bible Online

PAMMUJI 71 - Makassar Version – KITTA' MATANGKASA bible

PAMMUJI 71

¹IKattemi pa'la'langangku, o, Batara, teaKi' balang parekangia' nipakasiri'.

²Kilappassang laloa', saba' iKatte adelekKi', Kipilangngeria' siagang Kipasalamaka'.

³A'jariKi' untu' inakke sanrapang moncong batu tampa' pammantangangku, tuli akkullea kurapi' kubattui. Saba' le'ba'mi Kitappuki untu' ampasalamaka', iKattemi tampa' pammantangangku siagang pa'la'langangku.

⁴O, Allata'ala, Kilappassanga' battu ri tau ja'dalaka, battu ri koasana tau pallaka siagang tau sekkeka.

⁵Saba' iKattemi panrannuangku, o, Batara, o, Batara tappaka' mae ri Katte battu ri wattu rungkaku iji.

⁶Lalang sikontu tallasakku tanjenga' mae ri Katte; iKatte anjagaia' battu ri nilassukangku nakutuli mammuji mae ri Katte.

⁷A'jari contoi tallasakku mae ri tau jaia, saba' iKattemi pa'la'langang majarrekku.

⁸Tuli mammujia' mae ri Katte, sila'busu' alloi kukabarrang kalompoanTa.

⁹TeaKi' pelakkia' ri wattu toakumo teaKi' bokoia' punna tenamo kagassingangku,

¹⁰saba' napa'jari carita' musu-musungku, assikongkoloki tau eroka ambunoa'.

¹¹Nakana ke'nanga, “Nibokoimi ri Allata'ala; umba naniondangi siagang nijakkalaki, saba' tenamo lampasalamaki.”

¹²TeaKi' bellai battu ri nakke, o, Allata'ala, Allata'alaku, Kitulunga' linta'.

¹³Boli'mi kamma nipakasiri' siagang nipa'lanynya' tau ambakkaia'. Boli'mi kamma a'jari lingu siagang a'jari hina tau eroka ancilakaia'.

¹⁴Mingka inakke tuli lamanrannuanga' mae ri Katte, na pila' jai tau mammuji mae ri Katte.

¹⁵Sila'busu' alloi lakucarita sikamma gau' adeletTa, na kasalamakkang battua ri Katte nisawalaka nirekeng jaina.

¹⁶Kupuji gau' malompoTa, o Karaeng Allata'ala, kupa'la'bangi kaadelanTa, kaadelanTa bawang.

¹⁷O, Allata'ala, Kiajarakka' battu ri wattu rungkaku, sa'genna anne kamma kucaritai bate pare' malompoTa.

¹⁸O, Allata'ala, tea' laloKi' bokoia', sa'gengku toa siagang kebo' uukku, sollanna kukabarrang koasaTa siagang kaporeanTa mae ri sikontu turungang labattua.

¹⁹O, Allata'ala, kaadelanTa sanrapangi langika tinggina; tamaka lompona sikamma panggaukanTa; inaimi akkulle ampasangkammaiKi?

²⁰Kipitujuia' jai kapa'risang lompo, mingka iKatte lampoterangi kagassingangku siagang lampabangunga' ammotere' battu ri kuburuka.

²¹LaKipa'jaria' la'bi la'biri', siagang Kisaleoria' ammotere'.

²²Erokka' mammuji mae ri Katte siagang gambusu', saba' tamamminrayaKi', o, Allata'alaku. Erokka' akkelong lagu pammuji mae ri Katte siagang kacapi, o, Allata'alana Israel matangkasaka.

²³Akkio' marannua' ma'reja-reja, na kumakkelong mammuji ri Katte. Nyawaku siagang tubuku makkelong rannu, saba' le'ba'ma' Kipasalama'.

²⁴Sila'busu' alloi lakukabarrang kaadelanTa, saba' sikamma tau eroka ancilakaia' le'ba'mi nibeta siagang nipakasiri'.