Read Makassar Version – KITTA' MATANGKASA PAMMUJI 72 Bible Online

PAMMUJI 72 - Makassar Version – KITTA' MATANGKASA bible

PAMMUJI 72

¹Battu ri Salomo. O, Allata'ala, Kipangngajarrangi hukkunTa mae ri karaenga, Kipassareangi kaadelanTa mae ri ana' bura'nena karaenga.

²Poro naadeli ummatTa situru' hukkunga, na nagau' adele' tau nijallakkanga.

³Poro a'jari coppongi na salewangang pa'rasanganna ikambe, na nia' kaadelang mae ri sikontu bansaya.

⁴Poro naalleangangi karaenga ha'na ra'ya' ca'dia, natulung tu kasi-asia siagang natumpasa' sikamma tau anjallakkangiai ke'nanga.

⁵Poro tulusu' attahanna sa'genna sikontu turunganna lalang nia'na ija alloa siagang bulanga.

⁶Poro sanrapangi bosi turunga ri parang, sanrapang bosi lompo allo'lori sikamma kokoa.

⁷Poro pila' a'bakka' kaadelanga lalang sikontu jammanna, na alla'bi-la'bi kacopponganga lalang sikontu bulang niaka.

⁸ Lapila' a'bakkaki luara'na kakaraenganna battu ri tamparang se'rea mae ri tamparang maraenga, a'la'bang battu iraya sa'genna kalau'.

⁹Pandudu' parang lompoa latunduki mae ri ia na su'ju' musua ri dallekang bangkenna.

¹⁰Sikamma karaeng Tarsis siagang pulo-pulona langngerangi passare mae ri ia. Sikamma karaeng Arab siagang Etiopia battui angngerang passare.

¹¹Sikontu karaenga lasu'juki ri dallekanna, sikontu bansaya a'jari ata-atanna.

¹²Saba' nalappassangi tu nijallakkanga siagang tu tenaya pakkullena, siagang akkioki tu kasi-asia mae ri ia.

¹³Nakamaseangi tu kasi-asia siagang ra'ya' ca'dia, na napasalama' katallassanna tu kasi-asi puppusuka.

¹⁴Nalappassangi ke'nanga battu ri panjallakkanga siagang katerassanga, saba' lompoi anggaranna katallassanna ke'nanga mae ri ia.

¹⁵Mattallasaki karaenga! Poro nipassareangi mae ri ia bulaeng battua ri Arab. Poro nipappala' doangangi lalang sikontua wattu na tuli nisare pangngellai.

¹⁶Poro alla'bi-la'bi gandunga ri sikontu pa'rasangang, na rassi bulu'-bulu'na siagang wassele'na buttaya. Poro coppongi buttana sangkamma Bulu'-bulu'na Libanon, napila' katambang pandudu' kotana sanrapang ruku' ri parang.

¹⁷Poro tuli niu'ranginna arenna karaenga satunggu-tungguna, napila' masahoro' lalang nia'na mataalloa. Poro napalaki bansa-bansaya nanibarakkaki sangkamma ia, na sikontu tau antappuai arenna lamate'nei.

¹⁸Nipujimi Batara, Allata'alana Israel! Iaji bawang akkulle anggaukangi apa-apa appakalannasaka.

¹⁹Nipujimi areng malompoNa satunggu-tungguna; poro rassi sikontu linoa siagang kala'biranNa! Poro kajariang lalo kammaya, Aming!

²⁰Sikammaminjo pappala' doanna Daud, ana'na Isai.