Read Makassar Version – KITTA' MATANGKASA PAMMUJI 73 Bible Online

PAMMUJI 73 - Makassar Version – KITTA' MATANGKASA bible

PAMMUJI 73

¹Pammujina Asaf. Tamaka baji'na Allata'ala mae ri umma'Na, mae ri tau ci'nonga pa'mai'na.

²Mingka ranggaselama', la'birimmi tena tappakku,

³saba' angngiri mata' mae ri tau tampoa, ri wattunna kucini' kaupakkanna tau ja'dalaka.

⁴Saba' tena nasessa ke'nanga napakamma garring, tuli baji'na siagang kassa'na tubuna ke'nanga.

⁵Tena susana ke'nanga, tena nitujui ri kasukkarrang sangkamma tau maraenga.

⁶Lanri kammana minjo na'jari borromo ke'nanga, siagang tuli ero' a'gau' katerassang.

⁷Tattumpai kaja'dallanga battu lalang ri atinna ke'nanga; sibuki ke'nanga a'rancana kaja'dallang.

⁸Nacau-caui siagang napakka'-pakkanai taua, siagang akkana tampoi anggaratta' lanajallakkang taua.

⁹Napitinai ke'nanga Allata'ala ri suruga, nakkana borro mae ri sikamma taua ri lino,

¹⁰sa'genna manna umma'Na Allata'ala ta'giling todong mae ri ke'nanga, na tappa' mae ri bicaranna ke'nanga.

¹¹Nakana ke'nanga, “Tanaassengai Allata'ala, Kaminang Tinggia tena napahangi.”

¹²Kammaminjo lampa-lampana tau ja'dalaka; sannangi tallasa'na, tuli katambangi barang-baranna.

¹³Sia-siaji kujagai katangkassanna atingku; tena matu-matunna kupakabella kalengku battu ri dosaya.

¹⁴Saba' sila'busu' alloa' natuju nakasa'; bari'-bari'basakka' nisessa.

¹⁵Ebara' angkana akkana kamma' anjo, kubaliammi ana'-ana' ri bokoku.

¹⁶Mingka kuusahaina untu' ampahangi, teai sipato' susana anjo mae ri nakke.

¹⁷Kale'bakkanna antama' ri Balla'Na Batara mae ri Allata'ala, nakupahammo antekamma kale'bakkanna sallang tau ja'dalaka.

¹⁸Kiboliki ke'nanga ri agang laccuka, na Kibalang parekang ke'nanga tu'guru' a'jari posso'.

¹⁹Lalang sipakkida mataji bawang naancuru'mo ke'nanga, tamaka heba'na kapanrakang kale'bakkanna ke'nanga.

²⁰Sanrapang so'na lanynyaka ri wattu bari'basa'; ri wattu ambangunTa, o, Batara, lanynya' memammi ke'nanga.

²¹Ri wattu birisi'na kusa'ring, nasangkamma nito'do' atingku,

²²dongoka' natena kupahangi, sanrapanga' olo'-olo' ri dallekanTa.

²³Mingka tuli niaka' ri ampitTa, Kita'galaki lima kanangku.

²⁴Kirenrenga' siagang pappakainga', siagang Kitarima' lalang kala'birang sallang.

²⁵Inai kupatang ri suruga pantaranganna iKatte? Pantaranganna iKatte tena kukaeroki ri lino.

²⁶Manna pole na'jari lamma nyawaku siagang batangkalengku, iKatte kagassingangku, o, Allata'ala; iKattemi yangasenna kupatanga sa'genna satunggu-tungguna.

²⁷Lacilakai tau ambokoiaKi' Kiballassi tau tenaya majarre' mae ri Katte.

²⁸Mingka untu' inakke tamaka baji'na ma'reppeseka mae ri Allata'ala, Karaeng Allata'ala kupa'jari tampa' pa'la'langangku, sollanna akkulle kukabarrang sikontu panggaukanNa.