Read Makassar Version – KITTA' MATANGKASA PAMMUJI 74 Bible Online

PAMMUJI 74 - Makassar Version – KITTA' MATANGKASA bible

PAMMUJI 74

¹Kelong pangngajarang battu ri Asaf. O, Allata'ala, latulusu' Kibokoika ikambe? Angngapa Kitulusu' larro mae ri umma' kalenTa?

²Kiu'rangi ummatTa le'baka Kipile battu riolo, bansa Kipakabebasaka sollanna a'jari Kipatang. Kiu'rangi Bulu' Sion, Kipareka a'jari pammantangnganTa.

³Kijappai sai tampa' le'bakamo a'jari runtungang; sikontu apa-apa niaka ri BallatTa le'ba'mi naancuru' musua.

⁴Ammarrang-marrangi musua ri BallatTa, nappaenteng bate-bate pammetang anjoreng.

⁵Sanrapangi ke'nanga pata'bang kayu ansoeangi pangkulu'na, untu' anta'bangi poko'-poko' kayua ri romanga.

⁶Sikontu ukiri' kayua naancuru' ngasengi ke'nanga ammake pangkulu' siagang palu-palu.

⁷Natunui BallatTa sa'genna cappu'; nara'massi tampa' panynyombanga mae ri Katte.

⁸Eroki ke'nanga ampatundu' taba sikali ikambe, na natunu ngaseng sikontu tampa' ibadaya ri anne pa'rasanganga.

⁹Tenamo nicini' na'bi-na'bi siagang tanra-tanra appakalannasa', manna sitau tania' angngassengi sa'genna siapa sallona tulusu' lakamma anne.

¹⁰Sa'genna siapa sallona, o, Allata'ala, musua lancau-cauKi'? Sa'ge tulusu'naka ke'nanga langhinai arenTa?

¹¹Angngapa natenamo Kitulungi ikambe? Angngapa Kipapantarang limanTai anne ikambe?

¹²Battu rioloji naiKatte Karaengku, o, Allata'ala, iKattemi ampasalamaki ikambe.

¹³ Lalang kagassingang lompo naKipata'bage tamparanga, na Kireppe' ulunna sikamma naga tamparanga.

¹⁴ Kilicaki sikamma ulunna Lewiatan Kipa'jari kanrenai sikamma apa-apa niaka ri parang lompoa.

¹⁵Kipa'lo'loroki je'ne' timbusenga siagang je'ne' binangaya; binanga lompoa Kipa'jari kalotoroki.

¹⁶IKatte ampa'jari alloa siagang bangngia, siagang Kipattantu tampa'na alloa siagang bulanga.

¹⁷Kipattantui sikamma pa'baeng-paenna buttaya, Kipa'jari wattu timoroka siagang wattu baraka.

¹⁸Kiu'rangi laloi antekamma batena musunTa anghinaKi', o, Batara, bansa tenaya naassengKi' napitinai arenTa.

¹⁹TeaKi' passareangngi ummatTa tenaya pakkullena mae ri limanna musu pallaka. TeaKi' situlusutTa angkaluppai sarenna ummatTa ballasaka.

²⁰Kiu'rangi laloi parjanjiang Kipareka siagang ikambe, saba' nagaukangi taua katerassanga ri sikontu tampa' sassanga ri anne pa'rasanganga.

²¹TeaKi' balang parekangi nipakasiri' tau nijallakkanga, poro mammuji mae ri Katte tupa'risika siagang tu kasi-asia.

²²Ammenteng maKi' o, Allata'ala, Kipattojenga' ri parkaraku! Saba' sila'busu' alloKi' nihina ri tau tenaya natappa' mae ri Katte.

²³TeaKi' kaluppai pammarrang-marranganna musu-musunTa, pila' lompoi karicuanna sikamma balinTa!