Read Makassar Version – KITTA' MATANGKASA PAMMUJI 78 Bible Online

PAMMUJI 78 - Makassar Version – KITTA' MATANGKASA bible

PAMMUJI 78

¹Kelong pangngajara' battu ri Asaf. Pilangngeri pangngajarakku, he ikau bansaku, parhatikangi kana-kanangku.

² Erokka' appasulu' paruntu' kana siagang pangngebarang, nakupakasingara' boto-botoang jammang riolo,

³sikamma apa le'baka nalangngere' siagang natarima ikambe, nacaritaya boe-boena ikambe.

⁴Taerokai ikambe anrahasiakangi mae ri ana'-ana'na ikambe; eroki ikambe angkabarrangi mae ri ana'-ana' ri bokoa ri passala' koasaNa Batara siagang bate pare' malompoNa, sikamma gau'-gau' appakalannasa'Na.

⁵Napassareangi hukkunNa mae ri bansa Israel, siagang parentaNa mae turunganna Yakub. Nasuroi boe-boeta ampangngajarrangi mae ri ana'-ana'na ke'nanga,

⁶sollanna naasseng ana' ri bokoa, nampa napatulusu' pole mae ri ana'-ana'na ke'nanga.

⁷Lanri kammana anjo manrannuang tommi ke'nanga mae ri Allata'ala, tenamo nakaluppai panggaukanNa, mingka tuli mannuruki ri parentaNa,

⁸sollanna tena sangkamma ke'nanga boe-boena nangaia angngewa siagang doraka; ana'-ana' ta'lengga-lenggaya tappa'na, siagang tenaya namajarre' mae ri Allata'ala.

⁹Suku Efraim assanjata panaya siagang anrong pana, naerang kalenna lari ri wattunna a'bundu.

¹⁰Nadakkai parjanjianna ke'nanga siagang Allata'ala, taerokai mannuruki ri hukkunNa.

¹¹Nakaluppai ke'nanga sikamma apa le'baka Nagaukang, siagang apa-apa appakalannasa' le'baka nipa'nyatangi ke'nanga.

¹² Ri dallekanna boe-boena ke'nanga, a'gau' appakalannasaki Allata'ala ri pa'rasangang Mesir, ri lappara' Zoan.

¹³ Nabage ruai tamparanga, nampa napalimbang ke'nanga; napaentengi je'neka sangkamma tembo' pammantangngang je'ne'.

¹⁴ Naului ke'nanga siagang rammang ri wattu allo nampa nasare singara' pepe' sila'busu' bangngi.

¹⁵ Nareppeki moncong batua ri parang lompoa, nampa nasare ke'nanga je'ne' inung allumpa-lumpa.

¹⁶Nasuroi bulu' batua appasulu' je'ne', nampa assolommo je'neka sangkamma binanga.

¹⁷Mingka tulusu' dorakana ke'nanga mae ri Allata'ala, apparicui ke'nanga ri paranga mae ri Kaminang Tinggia.

¹⁸ Nakunjungimi ke'nanga naso'ri Allata'ala, appala' kanre nakaerokia ke'nanga.

¹⁹Naewami ke'nanga Allata'ala nakana, “Maka akkullei Allata'ala assareki' kanre ri parang lompoa?

²⁰Memang Natunrungi moncong batu kassaka, sa'genna assolong sarring je'neka. Mingka maka lakkulle tongi Napasadiang roti siagang Nasare dageng umma'Na?”

²¹Nalangngere'Na Allata'ala anjo, Nabakkaimi umma'Na siagang pepe'; pila' katambammi larroNa mae ri ke'nanga,

²²saba' tena natappa' ke'nanga mae ri Allata'ala, mae ri koasaNa akkullea ampasalamaki ke'nanga.

²³Mingka manna nakamma Naparenta tonji langika sollanna Nasungke sikamma pakke'bu'na.

²⁴ Appatarungi gandung battu ri suruga, kanre untu' lanakanrea ke'nanga.

²⁵Nasarei ke'nanga alla'bi-la'bi kanre; angnganrei ke'nanga roti malaeka'.

²⁶Nasuroi ammiri' anging battu rayaya; lanri koasaNa mammiriki anging battu timboroka.

²⁷Appaturungi jangang-jangang mae ri umma'Na, sangkamma kassi' jaina, takkullea nirekeng.

²⁸Natu'gurangi jangang-janganga anjo ri kemana ke'nanga ri tammulilina tampa' napammantangia ke'nanga.

²⁹Nampa angnganre ke'nanga sa'genna bassoro', saba' nisaremi ri Allata'ala apa nakaerokia ke'nanga.

³⁰Mingka tena tongija nasukku' napasuna ke'nanga; jari lalang angnganrena ija ke'nanga,

³¹a'jari larromi Allata'ala siagang Naewami ke'nanga; Nabunoi tu Israel rungkaya siagang porea.

³²Mingka manna nakamma tuli dorakana umma'Na, taerokai tappa' ke'nanga ri sikamma gau' appakalannasa'Na.

³³Jari Napa'le'ba'mi tallasa'na ke'nanga sanrapang nappasa', cappu'mi taung-taung tallasa'na ke'nanga lalang kamallakkang.

³⁴Kere wattu naNabuno Allata'ala siapa are jaina ri ke'nanga, assesse'lalammi maraenga nammotere' mae ri Ia.

³⁵Nau'rangimi ke'nanga angkana Allata'ala pa'la'langanna ke'nanga, siagang Kaminang Tinggia Tumappasalama'na ke'nanga.

³⁶Mingka naballe-ballei ke'nanga Allata'ala, bicaranna ke'nanga sangnging balle-balle bawang.

³⁷ Tena namajarre' ke'nanga mae ri Ia siagang tena nata'gala' jarreki parjanjianNa.

³⁸Mingka Nakamaseangi siagang Napammopporangi Allata'ala umma'Na, siagang tena Napapossoki ke'nanga. A'mole-molei Natahang larroNa, natena Napa'betteseki pangngalarroiNa.

³⁹Nau'rangi angkana anjo ke'nanga poro lamate ngasenji, sanrapang anging numalo tammotera.

⁴⁰Tamaka ma'mole-molena ke'nanga angngewa ri Ia, siagang napa'risi pa'mai'Na ri wattunna ri parang lompoa.

⁴¹A'mole-molei ke'nanga naso'ri Allata'ala, nasusai Kaminang Matangkasaka, Allata'alana Israel.

⁴²Tangngu'rangiai ke'nanga ri kakoasanNa, ri allo nipakabebasa'na ke'nanga battu ri balinna,

⁴³ri wattunna appa'nia' gau'-gau' appakalannasa' ri Mesir, siagang gau'-gau' malompo ri parang Zoan.

⁴⁴ Sikamma binangana ke'nanga napinrai a'jari cera', sa'genna takkulleamo ke'nanga angnginungi je'ne'na.

⁴⁵ Nasessai ke'nanga siagang jai katingalo, siagang nibalang parekangi buttana ke'nanga nipanraki ri tumpang.

⁴⁶ Appabattui olo' siagang katimbang, ampaccappuki kattoanna siagang wassele' kokonna ke'nanga.

⁴⁷ Napanraki poko' anggoroka siagang bosi batu, poko'-poko' arana ke'nanga siagang saliu' a'batu.

⁴⁸Nalappassangi bosi eska antujui olo'-olo' piarana ke'nanga, siagang nituju ri kila' olo'-olo' piarana ke'nanga.

⁴⁹Napa'betteseki kalarroanNa anrinra kamma pepe' nampa Napabattu se're pasukang malaeka' kamateang sa'genna a'jari tappu' pa'minasa ke'nanga.

⁵⁰Tena Natahangi larroNa yareka Nakarimangngi tallasa'na ke'nanga, mingka Naballassi ke'nanga siagang puru-puru lompo.

⁵¹ Nabunoi sikontu ana' toa bura'nena ke'nanga lalang ri massing kaluargana tu Mesir.

⁵² Nampa Napimping umma'Na sanrapang pa'rappungang gimbala', narurungang ke'nanga angngolo ri parang lompoa.

⁵³ Amangi siagang tenamo namalla' ke'nanga nipimping ri Ia, nampa musunna ke'nanga tallangi lalang ri tamparang.

⁵⁴ Nampa Naerang umma'Na mange ri butta matangkasa'Na, ri moncong Narampasaka KalenNa.

⁵⁵ Ri dallekanna umma'Na na Nabongka panduduka anjoreng nampa Nabage-bage anjo pa'rasanganga mae ri sikontu suku bansa Israel, umma'Na, sa'genna akkulle napammantangi ke'nanga kema-kemana musunna.

⁵⁶ Mingka angngewai ke'nanga siagang naso'ri Allata'ala Kaminang Tinggia, tanaturukiai ke'nanga parenta-parentaNa.

⁵⁷A'jari bali ke'nanga sangkamma boe-boena ke'nanga, takkulleai nipatappa' sanrapang jekkona anrong panaya.

⁵⁸Napa'ngarai ke'nanga Allata'ala ri tampa' panynyombang barhalaya, napassereati Allata'ala siagang patung-patunna ke'nanga.

⁵⁹Nacini'na kammaya, tamaka larroNa Allata'ala, Natolla' tojeng-tojemmi ke'nanga.

⁶⁰ Nabokoimi KemaNa ri Silo, tampa' pammantanganNa ri alla'na rupataua.

⁶¹ Nabalang parekangi Patti ParjanjianNa nialle ri musu; bate kala'biranNa nialle passa ri balia.

⁶²Larroi ri umma'Na, umma' pisakaNa, Nabalang parekangi ke'nanga nibuno siagang pa'dang.

⁶³Turungkana ke'nanga nikanrei ri pepe'; tena ambuntingi tulolonna ke'nanga.

⁶⁴Nibunoi imang-imanna ke'nanga siagang pa'dang, takkuleai appiraung janda-jandana ke'nanga.

⁶⁵Jari ambangummi Batara sangkamma tau ambangunga ri tinrona, sanrapang tau gassing ri le'ba'na angnginung anggoro'.

⁶⁶Natunrungi ammunduru' balinNa, na Nabeta ke'nanga sa'genna satunggu-tungguna.

⁶⁷Mingka Natollaki turunganna Yusuf siagang taNapileai suku Efraim.

⁶⁸Mingka Napilei suku Yehuda, siagang Bulu' Sion Nangaia.

⁶⁹Nabangungi Balla'Na sanrapang pammantanganNa ri suruga, sanrapang lino, kassaka sa'genna satunggu-tungguna.

⁷⁰ Napilei Daud atanNa, na Naalle battu ri alla'na olo'-olo' piarana,

⁷¹battu ri tampa'na ammarakai anrong gimbala', untu' angkalawaki Israel umma'Na.

⁷²Naparakai Daud ke'nanga siagang situlusu' pa'mai'na, cara'deki Daud ampimpingi ke'nanga.