Read Makassar Version – KITTA' MATANGKASA PAMMUJI 81 Bible Online

PAMMUJI 81 - Makassar Version – KITTA' MATANGKASA bible

PAMMUJI 81

¹Untu' pamimping pakelong. Situru' lagu: Gitit. Battu ri Asaf.

²Akkelongko pammuji-muji mae ri Allata'ala, kagassinganta, akkio' rannuko ma'reja-reja mae ri Allata'alana Yakub.

³Appasa'rako rabana, appasa'rako kelong, ko'bi' bajiki gambusuka siagang kacapia.

⁴ Tuiki tarompeka ri allo nipakalompota, ri passua'-suarrang bulang beru siagang bulang sumara'.

⁵Saba' kammai anjo paratoranga ri Israel, se're parenta battu ri Allata'alana Yakub.

⁶Napa'jari se're katantuang mae ri bansa Israel, ri wattunna maju angngewai Mesir. Allangngereka' bicara tenaya nakuassengi, angkana,

⁷“Le'ba'mi Kualle erangnganga ri salanggannu, naKulappassang karanjeng pisangngang niaka ri limannu.

⁸ Lalang kasusannu akkiokko, naKupasalamakko. Kupialiko battu ri gunturu' tampa' paccokkoangKu, Kuso'riko ri timbuseng je'neka ri Meriba.

⁹Pilangngeri pappakaingakKu, he kau ummakKu, Israel, ebara' angkana erokko ampilangngeriA'!

¹⁰ Tea' laloko niakki alla maraeng ri alla'nu, tea' laloko anynyombai ri rewata bansa maraeng.

¹¹INakkemi Batara Allata'alanu, anrurungangko assulu' battu ri Mesir. Wattunnu cipuru' Kusareko kanre.

¹²Mingka ummakKu taerokai mappilangngeri ri Nakke, taeroka Israel mannuruki ri Nakke.

¹³Lanri kammana Kubalang parekangi ke'nanga terasa' ulunna; lappassammi naturuki ero'na ke'nanga.

¹⁴Ah, ebara' angkana eroki ummakKu mappilangngeri ri Nakke, ebara' angkana eroki ke'nanga mannuruki ri Nakke,

¹⁵lalintakKa' ampatunduki musunna ke'nanga, naKubeta sikontu balinna ke'nanga.

¹⁶Tau birisika ri ke'nanga laKupatunduki, lanihukkungi ke'nanga satunggu-tungguna.

¹⁷Mingka ummakKu laKusarei kanre gandung nipile, naKupibassori ke'nanga siagang je'ne' bani romang.”