Read Makassar Version – KITTA' MATANGKASA PAMMUJI 85 Bible Online

PAMMUJI 85 - Makassar Version – KITTA' MATANGKASA bible

PAMMUJI 85

¹Untu' pamimping pakelong. Pammujina golongang Korah.

²MangngellaiKi' mae ri buttaTa, o, Batara, lampa-lampana Israel le'ba'mi Kipakabaji'.

³Le'ba'mi Kipammopporang dosa-dosana ummatTa; Kikaluppai sikontu kasalanna.

⁴Tenamo naKikalarroi ke'nanga; taKipa'jariami pangngalarroi lompoTa.

⁵Kipakabajiki ammotere' ikambe, o, Allata'ala Tumappasalama'na ikambe, tea' maKi' kalarroi pole ikambe.

⁶Untu' satunggunaka Kikalarroi ikambe? Tuli lalarroKi' mae ri turunganna ikambe?

⁷Pakajarreki ikambe ammotere' sollanna rannu ummatTa lanri pannulunTa.

⁸Kipa'nyatai angkana tuli mangngamaseangKi', o Batara, Kisare laloi kasalamakkang ikambe.

⁹Erokka' ampilangngeri kananNa Karaeng Allata'ala; Napa'janjiangi kasalewanganga mae ri katte, umma'Na, assala' tenaja nigaukang poleangi dosaya.

¹⁰Tojeng, sadiai lampasalamaki tau mappilangngeria, Allata'ala malompoa lammantangi ri pa'rasanganta.

¹¹Lasigappai pangngamaseanga siagang nyawa tamamminraya, lasirakaki kaadelanga siagang passiamakkanga.

¹²Lattimboi battu ri butta nyawa tamamminrana rupataua, lattoaki kaadelanNa Allata'ala battu ri langi'.

¹³Napassareangi Batara bajika, nalangngerang wassele' buttata.

¹⁴A'jappai ri dallekanNa Batara kaadelanga, napasadiang oloang Bataraya.