Read Makassar Version – KITTA' MATANGKASA PAMMUJI 86 Bible Online

PAMMUJI 86 - Makassar Version – KITTA' MATANGKASA bible

PAMMUJI 86

¹Pappala' doanna Daud. Kipilangngeri pappala' doangku, o, Batara, siagang Kipiali laloa', saba' kasi-asia' na kulamma.

²Kijagai tallasakku, saba' iKatte angkamaseanga', pasalamaki atanTa ia tappaka mae ri Katte.

³IKattemi Allata'alaku, Kikamaseanga' o, Batara, saba' sila'busu' alloa' appala' doang mae ri Katte.

⁴O, Batara, Kipakarannui pa'mai'na atanTa, saba' mae ri Katte tattuju atingku.

⁵IKatte bajikKi', o, Batara, Kingai ampamopporangi taua, tau appala' doanga mae ri Katte tuli Kikamaseangi siagang pangngamaseang alla'bi-la'bia.

⁶Kiparhatikang laloi pappala' doangku, o, Batara, Kipilangngeri pakkiokku appala' tulung.

⁷Ri wattungku kasukkarang appala' doanga' mae ri Katte, saba' iKatte ampialia'.

⁸O, Batara, tena batara pantaranganna iKatte, tena akkulle anggaukangi apa Kigaukanga.

⁹ Sikontu bansa Kipa'jaria labattu ngasengi, o, Batara, untu' anynyomba mae ri Katte siagang mammuji ri kalompoanTa.

¹⁰Saba' iKatte pore siagang anggaukangi gau'-gau' appakalannasaka, iKatteji bawang Allata'ala.

¹¹Kiajarakka' mae ri erotTa, o, Batara, sollanna kupinawang siagang majarre'; Kiajaria' a'jari tumappilangngeri sibatu pa'mai'.

¹²Appala' sukkurukka' mae ri Katte lalang sibatu pa'maikku o, Karaeng Allata'alaku; erokka' mammuji ri kalompoanTa satunggu-tungguna.

¹³Saba' tuli Kikamaseanga' lalang pangngamaseang lompoTa; Kilappassammi nyawaku battu ri kali'bong kuburuka.

¹⁴O, Allata'ala, ammentengi tau borroa ero' ambakkaia', sipa'rappungang tau palla' ero' ambunoa'; tena najampangiKi' ke'nanga.

¹⁵Mingka iKatte, o, Batara, Allata'ala mangngamaseang siagang manynyayang, sa'bara', la'bi pangngamaseang siagang majarre'.

¹⁶Kiparhatikanga' siagang Kikamaseanga', Kipakajarreka' siagang Kipasalamaka', saba' sangkamma ammakku, nakke manynyomba tonga' mae ri Katte.

¹⁷Kisarea' tanra kabajikanTa, o, Batara, sollanna a'jari siri'-siri' tau birisika ri nakke, punna nacini' ke'nanga angkana Kitulunga' siagang Kisaleoria'.