Read Makassar Version – KITTA' MATANGKASA PAMMUJI 89 Bible Online

PAMMUJI 89 - Makassar Version – KITTA' MATANGKASA bible

PAMMUJI 89

¹ Kelong pangngajara' battu ri Etan, tu Ezrahi.

²PangngarimangnginTa, o, Batara, latuli kukelongang, tamamminraTa lakukabarrang mae ri sikontu turungang.

³Saba' kuassengi angkana satunggu-tungguna pangngamaseanTa, majarreki tamamminraTa sanrapang langi'.

⁴Kikana, “Le'bakKa' appare' parjanjiang siagang tu nipileKu; le'bakKa' assumpa mae ri Daud, atangKu:

⁵ ‘Empoang kala'birannu laKupartahangkangi satunggu-tungguna, laniempoi ri ana' cucunna.’ ”

⁶Passirapakkanga ri suruga mammuji ri gau'-gau' mappakalannasatTa, na nakelongang tamamminraTa, o, Batara.

⁷Ri langi' tena sangkammanTa o, Batara, tena apa ri suruga ampasangkammaiKi'.

⁸NipakalompoKi' ri sikamma tau matangkasaka, nikamallakkangKi' la'biangngang nasikontu niaka ri tammuliliTa.

⁹O, Batara, Allata'ala Kaminang Koasaya, inaika sangkammanna gassinTa? MajarreKi' lalang sikontu-kontuna, o, Batara.

¹⁰IKatte makoasa ri tamparang lompoa bombanna, ampakasannangi bombang lompoa.

¹¹Rahab, naga tamparang, Kilicaki siagang Kibunoi, Kibetai sikontu musunTa siagang lima magassinTa.

¹²IKatte pata langika siagang buttaya, bate paretTa linoa siagang sikontu bonena.

¹³IKatte ampa'jari waraka siagang timboroka, makkio' rannui mae ri Katte Moncong Tabor siagang Hermon.

¹⁴Tamaka lompona koasaTa, tamaka heba'na kagassinganTa!

¹⁵Dasara'na kakaraenganTa iamintu kaadelang siagang hukkung, pangngamaseanTa siagang tamamminraTa a'nyatai lalang sikontu tindakanTa.

¹⁶Mate'nei bansa rannua anggaukangi ibadana, attalasaka lalang ri cayana kahaderanTa, o, Batara.

¹⁷Sila'busu' allo rannu ke'nanga siagang tuli majarre', lanri kabajikanTa.

¹⁸Kisarei ikambe pammetang lompo, lanri kabajikanTaji bawang nammeta ikambe.

¹⁹Saba' tuma'jagana ikambe iamintu tunipileTa, o, Batara; karaenna ikambe iamintu Allata'ala Matangkasa'na Israel pata.

²⁰Riolo dudu lalang se're so'na, Kikana mae ri ata tamamminraTa, “Le'baki Kutulung se'rea tubarani, se'rea tule'ba' Kupile battu ri ra'ya', Kupakatinggimi.

²¹ Kubuntulu'mi Daud, atangKu, nampa Kulanti' siagang minynya'-minynya' upacara.

²²Tuli lanijagai ri kagassingang battua ri Nakke, koasaKu lampakagassingi.

²³Talanibetayai ri musu, siagang talanijallakkangai ri tu ja'dala'.

²⁴Sikontu musunna laKuballassi, inai-nai angkabirisi Kubunoi.

²⁵Latuli Kukamaseangi siagang talamamminrayA' mae ri ia, siagang laKupa'jari pila' makoasai.

²⁶LaKupa'la'baki kakaraenganna, battu ri Tamparang Tangngaya sa'genna Binanga Efrat.

²⁷Lanakana ri Nakke, ‘IKattemi Manggeku, Allata'alaku, Pa'la'langangku siagang Tumappasalamakku.’

²⁸ Ia laKupa'jari ana' bura'ne toaKu, kaminang malompoa ri sikontu karaenga.

²⁹Latuli Kukamaseangi satunggu-tungguna, parjanjiangKu siagang ia tuli majarre'na.

³⁰Kupartahangkangi empoang kala'biranna lalang nia'na ija langika irateanna buttaya, lanaempoi sikontu ana' cucunna.

³¹Mingka punna nadakkai turunganna hukkungKu, natena nattallasa' situru' parentaKu,

³²punna tena najampangi apa le'baka Kupattantu siagang nabalang parekang paratorangKu,

³³laKuhukkungi ke'nanga paccambo' lanri tamannurukinna, laKupitujui bala ke'nanga lanri dosa-dosana.

³⁴Mingka tuli laKukamaseanna Daud, talaKukaluppaiyai nyawa tamamminraKu.

³⁵Tena Kukaluppai parjanjiangKu siagang ke'nanga, manna se're janjingKu talania' Kukaluppai.

³⁶SikalijA' assumpa untu' satunggu-tungguna lanri areng matangkasakKu; tena Kula'balle-balle mae ri Daud.

³⁷Lattahangi empoang kala'biranna lalang nia'naija mataalloa, lanaempoi sikontu ana' cucunna.

³⁸Tuli lania'na kakaraenganna sanrapang bulang, iami sa'bi tamamminra rate ri rammanga.”

³⁹Mingka anne kamma larroKi' mae ri karaenga, Kipelaki siagang Kitollaki tu nipileTa.

⁴⁰Kikaluppai parjanjianTa siagang atanTa, Kipasambilai empoang kala'biranna antama ri cammaraka.

⁴¹Kirumbangi tembo'-tembo' kalli' kotaya, tampa'-tampa' pattahanganna Kipa'jari rumbangang.

⁴²Sikontu tau allaloa anrampasaki apa-apanna, a'jari tunicau-caui ri bansa-bansa siampi'na.

⁴³Kisarei pammetang musu-musunna, Kipa'jari rannu ngasengi sikontu balinna.

⁴⁴Ba'lalo Kipa'jari tena matu-matunna sanjatana, tena Kitulungi lalang pa'bundukang.

⁴⁵Kipa'lebaki koasa accayana, Kipatappasaki naung ri butta empoang kakaraenganna.

⁴⁶Kipakabodoi umuru' rungkana, nampa Kitongko' kalenna siagang siri'.

⁴⁷Sa'genna siapa salloTa laccokko, o, Batara? Sa'genna siapa sallona la'rinra kamma pepe' kalarroanTa?

⁴⁸Kiu'rangi laloi antekamma bodona anne tallasakku, Kipa'jari rupataua a'jari tau lamate.

⁴⁹Inaika lakkulle tallasa' tuli siagang talamatea? Inaika akkulle alliliangi kuburuka?

⁵⁰O, Batara, kemaeji tanra pangngamaseanTa riolo, Kipa'janjianga mae ri Daud lanri tamamminraTa?

⁵¹Kiu'rangi o, Batara, antekamma batena nicalla anne atanTa, kukasiaki nihinaya ri jai bansa.

⁵²Musu-musunTa nahinai karaeng nipileTa, o, Batara, manna kemae lampana tuli nacau-caui.

⁵³Pujimi Batara sa'genna satunggu-tungguna. Jari lalomi kammaya anjo! Aming!