Read Makassar Version – KITTA' MATANGKASA PAMMUJI 9 Bible Online

PAMMUJI 9 - Makassar Version – KITTA' MATANGKASA bible

PAMMUJI 9

¹Untu' pamimping pakelong. Situru' lagu Mut-Laben. Pammujina Daud.

²Erokka' appala' sukkuru' lalang sikontu atingku ri Katte Batara, nakukabarrang kalompoanna bate paretTa.

³Erokka' ma'rannu-rannu siagang ma'reja-reja lanri iKatte na kupuji arenTa, Batara Kaminang Tinggia.

⁴A'bokoi na lari musungku ri dallekanTa; tatto'roi ke'nanga na mate.

⁵Nasaba' iKatte ammarenta, a'jari haking adele'; IKatte ampattojenga' ri parkaraku.

⁶IKatte le'ba' anghukkungi bansa-bansaya siagang Kiposso' sikamma tu ja'dalaka; nikaluppaimi ke'nanga sa'genna satunggu-tungguna.

⁷Cappu'mi Kipa'la'busu' musunna ikambe, Kiancuruki kota-kotana ke'nanga; tenamo tau langngu'rangi poleangi.

⁸Batara ammarenta satunggu-tungguna; Napaenteng empoang kala'biranNa untu' angngadeli linoa.

⁹Adeleki ammarenta ri bansa-bansaya na lambusuki angngadeli mae ri ke'nanga.

¹⁰Batara pa'la'langanna tu nijallakkanga, tampa' pa'la'langanna ri wattu kasusaanga.

¹¹Tau mangngassenga ri Katte manrannuangi ri Katte, o Batara, tu manynyombaya ri Katte tena naKibokoi.

¹²Pujimi Batara ammarentaya ri Sion! Caritai bate pare'Na mae ri bansa-bansaya!

¹³Nasaba' Nau'rangi tau pa'risika taNakaluppaiyai piraunna ke'nanga; Nahukkungi tu pallaka panggaukanna.

¹⁴Cinikima' anne, nisessa ri musua; kamaseanga', o, Batara, Kilappassanga' battu ri kamateanga,

¹⁵sollangku mammuji ri Katte ri dallekanna pandudu' Yerusalem. Lakkio'-kiokka' ma'rannu-rannu lanri Kipasalamakka'.

¹⁶Bansa-bansa tenaya naassengKi' tu'guru' antama' ri kali'bong nakekea kalenna ke'nanga; nialle ri sikko' napare' kalenna ke'nanga.

¹⁷Napa'nyatami KalenNa Batara lanri adele'na kaputusanNa. Loposoki tu ja'dalaka lanri panggaukang kalenna tonji.

¹⁸Mate kale'bakkanna tu ja'dalaka, bansa-bansa tenaya najampangi Allata'ala.

¹⁹Tena natuli nikaluppai satunggu-tungguna tu kasi-asia; tena natulusu' tena panrannuanna tu sessaya.

²⁰Ammenteng maKi', o, Batara, adelimi bansa-bansaya, teaKi' lappassangi taua ampakaborroi kalenna.

²¹Boli'mi kamma na'jari malla' ke'nanga, o, Batara, na naasseng kalenna angkana rupatauji bawang.