Read Makassar Version – KITTA' MATANGKASA PAMMUJI 90 Bible Online

PAMMUJI 90 - Makassar Version – KITTA' MATANGKASA bible

PAMMUJI 90

¹Pappala' doanna Musa, atanNa Allata'ala. O Batara, iKattemi tampa' pa'la'langanna ikambe sikontu turungang.

²Ri tenanapa nipa'jari sikamma moncong-monconga, tenanapa Kipareki buttaya siagang linoa, iKattemi Allata'ala mannannungang, tena pakaramulanTa nataena kala'busanTa.

³Kisuroi rupataua ammotere' mange ri assala'na, a'jari limbu'bu' butta sangkamma riolo.

⁴ Untu' iKatte sisa'bua taung sanrapang sialloji, allalomi allo subangngia; sanrapang passisambeang a'jaga ri wattu bangngi.

⁵Kilo'lorangi ikambe; sanrapang so'na, sanrapang ruku' accu'la';

⁶attimboi na'bakka' ri wattu bari'basa', mingka kalumengi ri wattu karuenna.

⁷Ta'bangkai ikambe ri kalarroanTa, cappuki posso' lanri larroTa.

⁸Kipadongkoki kasalanna ikambe ri dallekanTa, dosa taccokkona ikambe Kicini' ngasengi.

⁹Bodoi tallasa'na ikambe lanri kalarroanTa, le'baki taung-taung katallassanna ikambe sanrapang sipa'maikang nappasa'.

¹⁰Wattu tallasa'na ikambe poro tujupulo taunji bawang, punna gassing ikambe, sagantujupulo taung. Mingka kasukkarrang siagang kapa'risang bawang nagappa ikambe; le'baki attallasa' poro sinampe', allanynya'mi ikambe.

¹¹Inaika angngassengi lompona pangngalarroinTa? Yareka angngassengi kale'bakkanna kalarroanTa?

¹²Kipakaingaki ikambe antekamma bodona anne tallasaka sollanna a'jari tau tutu baji' ikambe.

¹³O, Batara, sa'genna siapa salloTa lalarro? Ammotere' lalo maKi' siagang Kikamaseangi ata-atanTa.

¹⁴Kipakajaimi pangngamaseanTa mae ri kambe bari'-bari'basa', sollanna rannu siagang akkelong ikambe lalang sikontu tallasa'na.

¹⁵Kisarei kate'neang ikambe sangkamma jaina pa'risika ia le'baka nakasia' lalang taung-taung ballasa'na ikambe.

¹⁶Kipicinikiangi ikambe ata-atanTa sikamma bate paretTa, siagang koasa accayaTa mae ri turunganna ikambe.

¹⁷O, Batara Allata'alana ikambe, Kibarakkaki ikambe, sollanna angngerang wassele' sikamma jama-jamanna ikambe.