Read Makassar Version – KITTA' MATANGKASA PAMMUJI 91 Bible Online

PAMMUJI 91 - Makassar Version – KITTA' MATANGKASA bible

PAMMUJI 91

¹Sikamma tau a'la'langa mae ri Kaminang Tinggia, ammantanga lalang ri pa'la'langanNa Kaminang Koasaya,

²akkullei angkana ri Batara, “IKattemi Tumappatojengku siagang pa'la'langangku, Allata'alaku, iKattemi kupatappa'.”

³LaNalappassangko battu ri bahaya taccokkoa, siagang battu ri garring angngeranga kamateang.

⁴LaNatongkokko siagang ka'nyi'Na, sa'gennu amang lalang ri la'lanNa; nyawa tamamminraNa sanrapangi pa'lapa' ri batangkalennu anjagaiko.

⁵Tea' mako mallakki ri bahaya wattu bangngia, yareka pa'bakka ti'ring battua ri wattu allo;

⁶ri bala battua ri wattu sassanga, yareka kaancurang antujuako ri tangngana alloa.

⁷Manna 1.000 tau mate ri sa'rinnu, na 10.000 ri sa'ri kanannu, mingka ikau tena nungngapa-apa.

⁸Punna accinikko mae ri tammulilinu, nuciniki tau ja'dalaka anggappa pa'balasa'.

⁹Saba' Batara nupa'jari Tumappasalama'nu, Kaminang Tinggia nupa'jari pa'la'langannu.

¹⁰Natalanatabayako bala, balla'nu talanitujuai ri bala lompo.

¹¹ Nasuroi Allata'ala malaeka'Na anjagaiko, untu' alla'langngiko manna kemae lampanu.

¹² Lanaangkakko ke'nanga lalang pala' limanna, sollanna tena nata'runtu' bangkennu ri batua.

¹³ Lanudakkai ularaka siagang singaya, langngonjokko singa rungka siagang ulara' a'racung.

¹⁴Nakana Batara, “LaKupasalamaki tau mangngaia mae ri Nakke, laKupasalamaki tau angngakuiA'.

¹⁵Punna akkio' mae ri Nakke, laKupiali. Ri wattu kasukkarang, laKutulungi; laKulappassangi na Kusare kalompoang.

¹⁶LaKupassukkuki pa'mai'na naKupakala'bu umuru'na, siagang Kupasalamaki.”