Read Makassar Version – KITTA' MATANGKASA PAMMUJI 92 Bible Online

PAMMUJI 92 - Makassar Version – KITTA' MATANGKASA bible

PAMMUJI 92

¹Kelong untu' allo Pammari-mariang.

²Tamaka baji'na appala' sukkuruka mae ri Katte, o, Batara, siagang mammuji ri Katte, Allata'ala Kaminang Tinggia;

³angkabarrangi pangngamaseanTa ri wattu bari'basa', siagang nyawa tamamminraTa ri wattu bangngi,

⁴angngo'bi' gitar sampuloa otere'na, nirurungang ri gambusu' siagang kacapi.

⁵Saba' panggaukanTa napakarannui pa'maikku, makkelong rannua' lanri bate paretTa.

⁶Tamaka lompona sikamma panggaukanTa, o, Batara, tamaka lantanna sikamma pikkiranTa!

⁷Tau dongoka takkulleai napahang, tau toloa takkulleai napahang.

⁸Nakulle kapang tau dorakaya coppongi sanrapang ruku'; tau ja'dalaka pila' kalumanynyangi na kala'biang; mingka laniballassi taba sikali ke'nanga,

⁹saba' iKatte, o Batara, koasaKi' satunggu-tungguna.

¹⁰Naassengi ikambe angkana lanipaccappuki musunTa, o, Batara, lanipasimbungi sikontu tau ja'dalaka.

¹¹Kipa'jari kassaka' sanrapang tedong romang liaraka, na Kibarakkakia' siagang kate'neang.

¹²Kuciniki nibetana musu-musungku, sikamma tau ammentenga untu' ambalianga', kulangngere'mi rancana-rancana ja'dala'na ke'nanga.

¹³Tau lambusuka accu'laki sanrapang poko' koro'ma, coppong timbona sanrapang poko' camara Libanon.

¹⁴Sanrapangi ke'nanga poko' nilamunga ri Balla'Na Batara, a'bakkaka ri Balla'Na Allata'alata,

¹⁵poko' tuli a'rappoa ri wattu toanamo, tuli moncongbulona siagang copponna.

¹⁶Iaminjo tanranna angkana adeleki Batara; Iami angngalleia', tena kajekkongang ri KalenNa.