Read Makassar Version – KITTA' MATANGKASA PAMMUJI 94 Bible Online

PAMMUJI 94 - Makassar Version – KITTA' MATANGKASA bible

PAMMUJI 94

¹O, Allata'ala, IKatte Allata'ala assarea pa'balasa', Kipappicinikang laloi pa'balasatTa, o, Batara.

²Ammenteng maKi', o, Hakinna sikontu linoa, Kiadelimi tau tampoa situru' panggaukanna ke'nanga.

³O, Batara, sa'genna siapa sallona larannu tau ja'dalaka? Sa'genna siapa sallona, o, Batara?

⁴Appasuluki ke'nanga kana-kana kasara', na napattampo-tampoang kaja'dallanna ke'nanga.

⁵Najallakkangi ke'nanga ummatTa, o, Batara, na nalica' sikamma tunipileTa.

⁶Nabunoi jandaya siagang ana'-ana' kukanga na bansa maraeng ammantanga ri anne pa'rasanganga.

⁷Nakana ke'nanga, “Tanacinikai Batara, tanijampangiai ri Allata'alana Yakub.”

⁸He bansaku, teako dongo' kammai anjo, appilajara' mako ampakei akkala'nu!

⁹Allata'ala appare' toli, maka tenaka Nallangngere'? Ia appare' mata, maka tenaka Naccini'?

¹⁰Ia angngajaraki bansa-bansaya, maka tenaka Nahukkungi taua? Ia a'jari guru mae ri sikontu taua, maka tena pangngassenganNa?

¹¹ Naassengi Batara pikkirang taccokkona rupataua, Naassengi angkana yangasenna sia-siaji bawang.

¹²Mate'nei tau Kiajaraka, o, Batara, tau Kiajaraka hukkung-hukkunTa.

¹³Kipakasannangi ri allo-allo nia'na bala lompo, sa'genna nikekeang kali'bong untu' anjakkalaki tau ja'dalaka.

¹⁴Saba' talaNabokoiyai Batara umma'Na; talaNabawang-bawangngangiai pisaka Napatanga.

¹⁵Nalanipaenteng poleammo hukkunga ri pangadelanga, sikontu tau lambusuka nasitujui ngasengi.

¹⁶Inai angngalleia' battu ri tau dorakaya? Inai angngagangnganga' angngewai tau a'gau' ja'dalaka?

¹⁷Ebara' angkana tena Natulunga' Batara, sike'de' mama' a'lette' mae ri linona tau matea.

¹⁸Wattu kunawa-nawana angkana latu'gurukka', pangngamaseanTa, o, Batara, ampa'jaria' ammenteng kassa'.

¹⁹Punna susa siagang lussa' pa'maikku, Kisaleoria' siagang Kipakarannua'.

²⁰Tena Kiagangngangi sikamma haking ja'dalaka, naKipake hukkunga appare' rancana ja'dala'.

²¹Assikongkoloki ke'nanga ambaliangi tau lambusuka, siagang anghukkung matei tau tenaya salana.

²²Mingka Batara Tumappatojengku, Allata'alaku a'jari pa'la'langangku.

²³Nahukkungi tau ja'dalaka situru' kaja'dallanna, Natongkoki bawana ke'nanga lanri dosana ke'nanga. Karaeng Allata'alata lantongkoki bawana ke'nanga.