Read Makassar Version – KITTA' MATANGKASA PAMMUJI 95 Bible Online

PAMMUJI 95 - Makassar Version – KITTA' MATANGKASA bible

PAMMUJI 95

¹Umba kimakkelong mae ri Batara, akkio' rannu mae ri Tumappasalamatta!

²Umba kimandallekang ri Ia siagang kelong kasukkurang, akkio' rannu ri Ia siagang lagu pammuji.

³Saba' Batarami Allata'ala malompo, Karaeng malompo rateanganna sikontu rewataya.

⁴Ia angkoasai bageang-bageang kaminang lantanna buttaya, coppo'-coppo'na monconga Ia todong pata.

⁵Ia angkoasai tamparanga, saba' Ia ampareki, bontoa pole bate pare'Na todong.

⁶Umba kisu'ju' anynyomba mae ri Ia, akkulantu' ri dallekanNa Batara, Tumapparetta.

⁷ Saba' Iami Allata'alata, ikatte umma' niparakaiNa, sanrapang gimbala' Nakalawakia. Anne alloa pilangngerimi sa'ranNa angkana:

⁸ “Teako terassi ulunnu sangkamma boe-boenu ri Meriba, sangkamma wattunna ri Masa ke'nanga, ri parang lompoa.

⁹Anjoreng naso'riA' ke'nanga, manna mamo nacini'mo apa le'baka Kugaukang.

¹⁰Patampulo taungA' ero' ta'langnge anciniki ke'nanga; Kukana: Tamaka tamattantuna nyawana anjo bansaya! Tanajampangiai ke'nanga parenta-parentaKu.

¹¹ Jari assumpaMa' lalang larroKu, angkana talantamakkai ke'nanga ri anjo pa'rasanganga untu' anggappa pammari-mariang siagang iNakke.”