Read Makassar Version – KITTA' MATANGKASA PAMMUJI 97 Bible Online

PAMMUJI 97 - Makassar Version – KITTA' MATANGKASA bible

PAMMUJI 97

¹Batarami Karaeng! Poro rannumi linoa, na ma'reja-reja pulo-puloa.

²Nikulilingi ri rammang siagang kasassangang; dasara'na pamarentahanNa iamintu kaadelang siagang hukkung.

³A'la'baki pepeka ri dallekanNa, Napakamutungi musu niaka akkuliling.

⁴Kila'Na assingari linoa, annekkereki buttaya anciniki.

⁵Assolongi sikamma monconga sanrapang liling ri dallekanNa Batara, ri dallekanNa Batara, sikontu makoasaya ri sikontu linoa.

⁶Langi' angkabarrangi kaadelanNa, na sikontu bansaya anciniki kala'biranNa.

⁷Sikontu tau anynyombaya ri barhala lanipakasiriki, ampattampoangai barang-barang tenaya matu-matunna; sikontu rewataya lasu'juki ri dallekanNa Batara.

⁸Sannangi pa'mai'na pandudu'na Sion siagang kota-kota Yehuda ri wattu nalangngere'na kaputusanNa Batara.

⁹Saba' iKatte, o, Batara, makoasa ri sikontu lino; iKatte malompo la'biangang na sikontu rewataya.

¹⁰He, ikau ngaseng mangngaia ri Batara, kabirisi laloi kaja'dallanga! Saba' Najagai Batara tallasa'na umma'Na, Napakabebasaki ke'nanga battu ri koasana tu dorakaya.

¹¹Ammumbami singaraka mae ri tau tulusuka pa'mai'na, siagang karannuanga mae ri tau lambusuka.

¹²Rannu mako, he sikamma tau tulusu' pa'maika lanri apa le'baka Nagaukang Batara, siagang appala' sukkurukko mae ri Allata'ala matangkasaka.