Read Makassar Version – KITTA' MATANGKASA PAMMUJI 98 Bible Online

PAMMUJI 98 - Makassar Version – KITTA' MATANGKASA bible

PAMMUJI 98

¹Pammuji. Akkelongko lagu beru mae ri Batara, lanri sikamma panggaukang malompoNa! Lanri koasa siagang kagassingang KalenNa nanggappamo pammetang.

²Nakabarrang Batara pammetanNa; napa'nyatai kaadelanNa mae ri bansa-bansaya.

³Nau'rangi pangngamaseanNa siagang pa'mai' tamamminraNa mae ri Israel umma'Na. Sikontu bansaya ri lino nacini'mi pammetanNa Allata'alata.

⁴Akkio' rannuko mae ri Batara, he sikontu lino! Pujimi Batara siagang kelong na makkio' rannu.

⁵Akkelongko lagu pammuji mae ri Batara, siagang ko'bi'-ko'bi' kacapi.

⁶Pasa'rai musika siagang tarompeka, akkio' rannuko mae ri Batara, Karaenta.

⁷Ammarrungko he tamparang siagang sikontu bonena buttaya siagang sikontu niaka ri tompo'na.

⁸Boli'mi kamma attempa-tempa lima sikamma binangaya, nakkio' rannu sikamma buluka ri dallekanNa Batara.

⁹Saba' battui untu' angngadeli linoa; bansa-bansaya laNaadeli siagang adele' na tojeng.