Read Makassar Version – KITTA' MATANGKASA PANGNGEBARANG 1 Bible Online

PANGNGEBARANG 1 - Makassar Version – KITTA' MATANGKASA bible

PANGNGEBARANG 1

¹ Iaminne sikamma pappakainga'na Salomo ana' bura'nena Daud, karaeng Israel.

²Matu-matunna iamintu untu' antulungi taua sollanna naasseng antekamma batena nakkulle a'jari tu cara'de', siagang naasseng atorang baji'na nikanaya katallassang, kammayatompa nakkulle napahang battuanna kana rapang-rapang malantanga battuanna.

³Anne sikamma pappakaingaka naajaraki taua antekamma nakkulle a'jari tu cara'de' lalang tallasa'na, lambusu', adele' siagang annaba.

⁴Naajaraki tau tenaya pangalamanna sa'genna a'jari tarang pikkiranna, kammayatompa tau rungkaya naajaraki a'jari tau cara'de' siagang appikkiri' kamma tau toa.

⁵Lanri anne sikamma pappakaingaka namanna tau cara'deka lanatambai tongi pangngassenganna, kammayatompa tau niaka sikolana lanipimping tongi.

⁶Lanri kammana nakkullemo naselangngi apa battuang taccokkona anjo pappakaingaka siagang napahang kana-kananna tau cara'deka kammayatompa sikamma passala' napakkuta'nangnganga ke'nanga.

⁷ Sollanna akkulle nigappa pangngassengang sitojennaya, uru-urua parallu niparhatikang iamintu parallui taua mappakala'biri' siagang malla' mae ri Batara. Tau toloa tena naanggaraki kacara'dekanga siagang taerokai niajara'.

⁸Parhatikangi kananna anrong manggenu, anakku,

⁹saba' anjo sikamma ajaranna ke'nanga natambai akkala' baji'nu, sanrapang belo-belo ri ulunnu siagang rante bulaeng ampakaga'gai tanja'nu.

¹⁰Punna nanyonyokko tau rungkaya, anakku, teako turuki panynyonyo'na ke'nanga.

¹¹Ebara' nakana ke'nanga, “Umba, ki'lampa mange a'boya tau nampa niborongi. Sollanna nia' nigaukang, umba naniba'ji tau tenaya salana.

¹²Kamma-kamma anne sannangi nyawana siagang sehaki tubuna ke'nanga, mingka sallang la'jari sangkammai tau sitangnga mate ke'nanga.

¹³Niallei barang-barang ka'jala'na ke'nanga, sollanna rassi ballatta siagang barang-barang nirampasa'.

¹⁴Umba, amminawang mako. Sinampe' nanibage sangkamma-kamma anjo barang-barang nirampasaka.”

¹⁵Teako amminawangngi mae ri tau kammaya anjo, ikau ana'-anakku! Pakabellai kalennu battu ri ke'nanga.

¹⁶Tena nalammakkang ke'nanga punna tenapa na'gau' ja'dala'. Eroki akkaro-karo ke'nanga ammuno.

¹⁷Manna jangang-janganga tena todong nalantama' ri sikko' nitannanga ri dallekang matanna,

¹⁸mingka anjo tau ja'dalaka ba'lalo kalenna tonji ke'nanga natannangngi sikko', iamintu sikko' lambalai kalenna ke'nanga.

¹⁹Kamma memangi, angkanaya tau ammakea katerassang a'boya dalle', nyawana tonji ke'nanga lanapabayara'.

²⁰ Pilangngeri! Kacara'dekanga akkio'-kioki ri agang-aganga siagang ammarrang-marrangi ri sikamma paranga!

²¹Akkio'-kioki ri sikamma pakke'bu' lompoa siagang ri tampa'-tampa' suaraka, angkana:

²²“He tau dongoka! Siapa sallonu tuli lakamma? Kerepi wattu nanupammari ambawang-bawangngangi pangngassenganga siagang ansorongbokoi pappilajaranga?

²³Pilangngeria' punna kupasaileko, na lakupa'nyata bonena atingku, siagang kuajarrangko pangngassengangku.

²⁴Le'ba' mako kukio' ngaseng, mingka taerokako siagang tena ngaseng nujampangi.

²⁵Sikontu pappakaingakku nubalang parekangi siagang pappasaileku nusorongbokoi.

²⁶Lanri kammana, punna cilakako, lakukakkaliko. Punna nabattuiko malla', lakucau-cauko.

²⁷Ba, lakucau-cauko punna lussakko siagang sessako lanri nitujuko ri bala ia battua sanrapang anging lompo.

²⁸Anjo wattua lakkio' ngasengko mae ri nakke, mingka talappialia'. Lanuboya' ri kere-keremae, mingka talanubuntula'.

²⁹Sangkamma ngasengko tau tenaya nale'ba' nungai anggappa pangngassengang, kammayatompa limpuruki bukunnu mannuruki ri Batara.

³⁰Tale'bakako ero' antarimai sikamma pappakaingakku siagang sikamma pappasaileku.

³¹Lanri kammana, lanukasia' ngasengi sallang kale'bakkanna sikamma panggaukang-panggaukannu siagang rancana-rancana kodinu.

³²Tau tenaya pangalamanna lamatei lanri tanajampangia', kammayatompa tau toloa laancuruki lanri tanajampangia'.

³³Mingka tau mappilangngeria ri nakke laniparakai. Laamangi lalang tallasa'na siagang tena naparallu malla'.”