Read Makassar Version – KITTA' MATANGKASA PANGNGEBARANG 10 Bible Online

PANGNGEBARANG 10 - Makassar Version – KITTA' MATANGKASA bible

PANGNGEBARANG 10

¹Iaminne sikamma pappakainga'na Salomo: Ana' cara'deka iami nakalompoang pa'maika manggena; ana' toloa napakasusai pa'mai'na amma'na.

²Kakalumanynyangngang nigappaya battu ri akkala' salaya tena nangngerang kaupakkang; kabalekanna, kalambusanga lappasalamaki.

³Batara tena Nabalang parekangi tau bajika naalle cipuru'; mingka Nahalangi tau ja'dalaka sollanna tanagappaya apa nakaerokia.

⁴Tau malasaka latu'guru' kasi-asi; tau rajenga la'jari kalumanynyangi.

⁵Tau cara'deka appa'rappungi kattoang punna narapi' wattunna, mingka tau attinroa bawang ri wattu pakkattoanga, lanapakasiriki kalenna.

⁶Tau bajika langgappai barakka'. Kapallakkanga taccokkoi ri bokona kana-kananna tau ja'dalaka.

⁷Pangngu'rangia mae ri tau bajika angngerangi barakka', mingka tau ja'dalaka lintaki nikaluppai.

⁸Tau cara'deka, nangai annarima pappasaile; tau dongoka ri bicaranna lalingui.

⁹Tau lambusuka, amangi tallasa'na; tau annipua lakaassengangi.

¹⁰Inai ancokkoi katojenganga, appaumbai kasusaang; inai akkana lambusu' ancallai kodia, angngusahai kasalewangang.

¹¹Kana-kananna tau bajika lappa'niaki tallasa' mate'ne, mingka ri bokona kana-kananna tau ja'dalaka taccokkoi pa'mai' pallaka.

¹² Kabirissanga appaumbai pa'beserang; mangngamaseanga napammopporangi sikontu kasalanga.

¹³Tau taranga pikkiranna, kana-kana cara'de' napasulu'; tau toloa parallui nicambo'.

¹⁴Tau cara'deka appasse'rei pangngassengang; punna tau toloa a'bicara, bala nakio'.

¹⁵Kakalumanynyangngang alla'langi tu kalumanynyanga, tallasa' ta'ronang-ronang angngancuruki tu kasi-asia.

¹⁶Punna nigaukang bajika, pahalana iamintu tallasa' mate'ne; punna nigaukang dosaya, kale'bakkanna pila' jai dosa.

¹⁷Inai anjampangi pappasailea, lasalewangangi tallasa'na, inai battala' angngakui kasalanna, niaki lalang bahaya.

¹⁸Tau accokkoa kabirisang iami patipu. Tau appa'la'banga pitina iami tau dongo'.

¹⁹Pila' jai bicara, pila' a'reppeseki dosaya; tau akkullea ampakalewai lilana, iami tau cara'de'.

²⁰Kana-kananna tau bajika sanrapangi pera' ti'no'; pikkiranna tau ja'dalaka tena anggaranna.

²¹Kana-kananna tau bajika, a'jari barakkaki mae ri tau jaia; kadongokanna tao dongoka ambunoi kalenna.

²²Lanri barakka'Na bawang Batara na'jari kalumanynyang taua; anjama terasaka takkulleai natambai barang-baranga.

²³Tau dongoka nangai appanggaukang salaya; tau cara'deka nangai a'boya kacara'dekang.

²⁴Tau te'nea pa'mai'na lanagappai apa nakaerokia; tau ja'dalaka nagappai apa kaminang nakamallakkanga.

²⁵Punna battu anging lompoa antujui, lanynya'mi tau ja'dalaka; mingka tau lambusuka tuli jarreki satunggu-tungguna.

²⁶Teako assuroi tau malasa', appakabirisi'ji bawang, sanrapang cukka appatilu gigi yareka umbu appakapacce mata.

²⁷Pakalompoi Batara, nanusallo lattallasa'; tau ja'dalaka mate taria'jala'nai.

²⁸Panrannuanna tau bajika ampa'jari mate'nei; panrannuanna tau ja'dalaka tena sikali bonena.

²⁹Batara anjagai tau lambusuka, mingka Napanraki tau a'gau' ja'dalaka.

³⁰Tau te'nea pa'mai'na tallasa'na laamangi na salewangang; tau ja'dalaka talammantangai ri butta pisakaya.

³¹Tau te'nea pa'mai'na appasuluki kana-kana cara'de'; tau ja'dalaka lanijempangangi bawana.

³²Kana-kana tau te'nea pa'mai'na appakasannangi nyawa; kana-kana tau ja'dalaka tuli appakapa'risiki pa'mai'.