Read Makassar Version – KITTA' MATANGKASA PANGNGEBARANG 12 Bible Online

PANGNGEBARANG 12 - Makassar Version – KITTA' MATANGKASA bible

PANGNGEBARANG 12

¹Tau mangngaia ri pangngassengang sannangi nyawana nipasaile; mingka tau tenaya nangai nipasaile iami tau dongo'.

²Tau bajika ningai ri Batara, mingka tau a'rancanga kaja'dallang langgappai hukkungang.

³Tena manna sitau tuli lapore lalang ri kaja'dallanna; mingka tau lambusuka tuli jarreki, takkulleai ta'lengga.

⁴Tubaine bajika iami kalompoang pa'mai' siagang kate'neang mae ri bura'nenna, baine ampakasirikai bura'nenna sanrapangi garring lalang ri buku, ammanrakia.

⁵Tau lambusuka nanawa-nawai apa-apa bajika; tau ja'dalaka annipua narancana.

⁶Kana-kananna tau ja'dalaka ammunoi; kana-kananna tau lambusuka appasalamaki.

⁷Tau ja'dalaka latu'guruki napanra' tena bate-batena; mingka tau bajika latuli jarreki sikontu turungang.

⁸Lanipuji taua situru' kacara'dekanna; nihinai taua situru' kadongokanna.

⁹Bajikangngangi a'jari ra'ya' ca'di niaka jama-jamanna, kala assipa' kamma tau malompo nakakurangang ri kanre.

¹⁰Tau bajika naparhatikangi olo'-olo' piarana; mingka tau ja'dalaka nasessai.

¹¹Pamarri anjama terasaka jai kanre-kanreanna, mingka tau ampelakai wattunna untu' anggaukangi apa-apa tenaya matu-matunna, iami dongo'.

¹²Tau ja'dalaka eroki anggappa passawallang battu ri tau dorakaya; tau bajika sanrapangi poko' kayu a'rappoa.

¹³Tau ja'dalaka niallei ri sikko' kana-kana kodi napasuluka; tau bajika nipalili battu ri kasukkarranga.

¹⁴Tunggala' tau anggappai pa'balasa' situru' kana-kananna siagang panggaukanna; massing nisarei pahala situru' kana-kananna siagang panggaukanna.

¹⁵Tau dongoka nakanai kalenna tale'baka sala, mingka tau cara'deka nangai appilangngeri pappakainga'.

¹⁶Punna kasi'rikang tau toloa, anjo wattua napau memammi pa'risi' pa'mai'na; mingka tau cara'deka tanapaduliai punna nicallai.

¹⁷Lanri napauna katojenganga, napaentemmi taua kaadelanga; lanri a'balle-ballena, appabattumi taua apa tenaya naadele'.

¹⁸Bicara sambaranga akkullei nalokoki pa'maika sanrapang panno'do'na pa'danga; kana-kana cara'deka sanrapangi pa'balle appamollea.

¹⁹Sipakkida mataji natassungkemo balle-ballea, mingka kana-kana tojenga latuli niaki satunggu-tungguna.

²⁰Tau nangaia a'rancana kaja'dallang nangai tenaya naadele'; tau angngusahaya kabajikang lamate'nei.

²¹Tau bajika talanatujuai bala; tau ja'dalaka tuli lanatujui susa.

²²Birisiki Batara mae ri tau paballe-ballea; mingka sannangi mae ri tau lambusuka.

²³Tau cara'deka tena napappicini'-cinikangi pangngassenganna; tau dongoka napa'lammorangi kadongokanna.

²⁴Anjama terasaka napa'jari taua koasa; kamalassanga napa'jari taua ata.

²⁵Ranggaselaya natepoki sumangaka, mingka kana-kana lammaya napakalompoi pa'maika.

²⁶Tau bajika upakkangngangi na sambori'na; tau ja'dalaka sala oloangi lanri kaja'dallanna.

²⁷Punna a'malasa'-malasa' talanagappayai taua apa nakaerokia; lanri anjama terasa' nanggappa taua kakalumanynyangngang.

²⁸Tau amminawanga ri oloang annabaya lamate'nei ri tallasa'na; tau amminawanga ri oloanna tau ja'dalaka lamangei ri matea.