Read Makassar Version – KITTA' MATANGKASA PANGNGEBARANG 13 Bible Online

PANGNGEBARANG 13 - Makassar Version – KITTA' MATANGKASA bible

PANGNGEBARANG 13

¹Ana' cara'deka naparhatikangi punna nipakainga' ri manggena; tau borroa taerokai annarima pappasaile.

²Kana-kananna tau bajika appabattui passawallang; tau tenaya nalambusu' nangai katerassanga.

³Tau tenaya natutu ri kana-kananna tena nalaamang ri tallasa'na; tau a'bicara sambaranga lanatujui kacilakang.

⁴Tau malasaka jai nakaeroki mingka manna se're tanarapi' tau anjama terasaka lanagappai sikontu apa nakaerokia.

⁵Tau lambusuka nakabirisi nikanaya balle-balle, gau'-gau'na tau ja'dalaka appakasiriki na nicalla.

⁶Kalambusanga nala'langi tau lambusuka ri tallasa'na; kaja'dallanga napanraki tau dorakaya.

⁷Nia' tau a'gau' kalumanynyang, natena apa-apanna; nia' tau a'gau' kasi-asi, nakalumanynyang kalupepeang.

⁸Tau kalumanynyanga musti appasuluki doe' sollanna amang tallasa'na; mingka tau kasi-asia nipakabellai battu ri balaya.

⁹Tau bajika sanrapangi caya sannaka singara'na; tau ja'dalaka sanrapangi lampu matea.

¹⁰Katampoanna poro pa'beserang bawang napaumba; tau cara'deka eroki annarima pangngajarang.

¹¹Kakalumanynyangngang lomo dudua gappanna, linta' tongi kurang; mingka barang-barang nipa'du'duka tassike'de'-tassike'de' lapila' katambangi.

¹²Punna tanigappaya apa niminasaya, ta'ronangi nyawaya; punna nigappa apa nikaerokia, sunggui pa'maika.

¹³Tau ambawang-bawangngangai ajaranNa Batara, lanacilakai kalenna; tau mannurukia ri hukkunNa Allata'ala, lanagappai pahalana.

¹⁴Ajaranna tau cara'deka sanrapangi kabattuanna kate'neanga; punna nia' bala latattuju, anjo ajaranga appasalama'.

¹⁵Tau bajika akkala'na lanipalecei; tau tenaya nipatappaki lasusai tallasa'na.

¹⁶Tau cara'deka appikkiriki rolong ri tenanapa nappanggaukang; tau toloa napa'lammorangi katoloanna.

¹⁷Tunisuro tenaya matu-matunna langngerangi bala; tunisuro akkullea nipatappa' langngerangi wassele' mattantu.

¹⁸Tau taeroka niajara', la'jari kasi-asi na tuna; tau najampangia pappakaingaka lanipakalompoi.

¹⁹Tamaka baji'na anggappayai apa nikaerokia! Tau dongoka taerokai ta'giling batu ri kaja'dallanga.

²⁰Tau assileporanga siagang tau cara'deka, la'jari cara'deki; tau assileporanga siagang tau toloa, lacilakai.

²¹Tau dorakaya tuli niondangi ri kacilakang, tau bajika tuli annarimai kate'neang.

²²Tau bajika ammoliki warisi' kakalumanynyangngang mae ri ana' cucunna; kakalumanynyangnganna tau dorakaya niboliki untu' tau lambusuka ri tallasa'na.

²³Butta kosonga akkullei angngerang wassele' jai kanre-kanreang untu' tu kasi-asia; mingka tenaya naadele' la'jari sabaki natena nangngerang wassele' anjo buttaya.

²⁴Punna tanitunrunga anaka, battuanna tena nimangngai ri ia; punna ningai, musti barani taua antunrungi.

²⁵Tau bajika tuli gannaki ri katallassanna, mingka tau ja'dalaka tuli lakakurangangi.