Read Makassar Version – KITTA' MATANGKASA PANGNGEBARANG 15 Bible Online

PANGNGEBARANG 15 - Makassar Version – KITTA' MATANGKASA bible

PANGNGEBARANG 15

¹Pappiali lammaya, ampa'jari naungi larroa; pappiali passea appaumbai larro.

²Kana-kana cara'deka ampa'jari pangngassenganga angngalle pa'mai'; kana-kana tau dongoka, poro kadongokang bawang bonena.

³Naciniki Batara sikontu apa kajarianga ri sikontu tampa'; Naparhatikangi sikontu apa bajika siagang ja'dalaka.

⁴Kana-kana bajika annambai sumanga', kana-kana appakapa'risika nyawa, allammai pattujuang.

⁵Tau dongoka nabawang-bawangngangi pappakainga'na manggena, tau cara'deka Naparhatikangi pappasailea.

⁶Ri balla'na tau bajika jai barang-barang; kakalumanynyangnganna tau ja'dalaka lalanynyaki lanri bala.

⁷Kana-kana tau cara'deka rassi siagang pangngassengang, mingka pikkiranna tau dongoka tena nakamma.

⁸Natarimai Batara pappala' doanna tau bajika, mingka birisiki mae ri passarena tau ja'dalaka.

⁹Birisiki Batara ri batena attallasa' tau dorakaya, mingka Nakamaseangi tau usahaya anggaukangi ero'Na.

¹⁰Tau a'gau' ja'dalaka lanisessai; tau taeroka nipasaile lamatei.

¹¹Naassengi Batara linona tau matea siagang lampa-lampana; antekamma batena lakkulle nicokko pikkiranna taua mae ri Ia?

¹²Tau masarroa anghinai paranna tau, tanangaiyai nipasaile; kuttui appala' tangara' battu ri tau cara'deka.

¹³Pa'mai' rannua napaccayai tanjaka; pa'mai' si'naya natepoki sumangaka.

¹⁴Tau cara'deka a'boyai pangngassengang; tau dongoka sibuki siagang kadongokanga.

¹⁵Tau susaya tuli appattujuangi lalang tallasa'na, mingka tau sarro rannua tuli mate'nei.

¹⁶Bajikangngangi sike'deka barang-barang mingka mallakki' ri Batara, kala jai barang mingka tuli lussaki pa'maika.

¹⁷Bajikangngangi gangang bawang nikanre assala' sikamaseangi taua, kala angnganrea dageng mingka sikabirisi taua.

¹⁸Tau lintaka larro appaumbai pa'beserang, tau sa'baraka angngerangi passiamakkang.

¹⁹Tau malasaka tuli lanakasiaki kasukkaranga; tau lambusuka tammuntulai kasukkarang.

²⁰Ana' cara'deka, napakasannangi pa'mai'na manggena; ana' toloa tanapakala'birai amma'na.

²¹Katoloanga iami kasannangnganna tau dongoka, tau cara'deka lambusuki tallasa'na.

²²Rancanaya takkulleai a'jari punna tena nirurungangi siagang tangara' baji'; lanjari rancanaya, punna jai assare pappakainga'.

²³Kana-kana nipasuluka ri wattu kaminang cocoka, langngerangi karannuang.

²⁴Tau cara'deka amminawangi ri oloang angngambika mange ri katallassanga; teai oloang naunga mae ri kamateanga.

²⁵LaNarumbangi Batara balla'na tau tinggi langgaya, mingka laNajagai buttana sitaua janda.

²⁶Birisiki Batara ri rancana ja'dalaka; mingka kana-kana bajika napakasannangi pa'mai'Na.

²⁷Inai a'boya passawallang tenaya nahallala', napanraki kaluarga kalenna. Inai angkabirisi doe' pammuccuka, lamate'nei.

²⁸Tau bajika natangara' bajiki kana-kananna; tau ja'dalaka appasuluki kana-kana rantasaka.

²⁹Napilangngeri Batara punna appala' doang tau bajika, mingka tena najampangi tau dorakaya.

³⁰Tanja'na tau rannua appakarannui pa'mai', kabara' bajika appakabajiki nyawa.

³¹Tau manjampangia pappasaile nibilangi tau cara'de'.

³²Tau taeroka nipakainga', tena napakala'biriki kalenna; tau eroka nipasaile, a'jari bajiki akkala'na.

³³Mallaka mae ri Batara, iami dasara'na ajarang bajika; kala'biranga nipirioloi ri matuna pa'maika.