Read Makassar Version – KITTA' MATANGKASA PANGNGEBARANG 16 Bible Online

PANGNGEBARANG 16 - Makassar Version – KITTA' MATANGKASA bible

PANGNGEBARANG 16

¹Rupataua akkullei appare' rancana, mingka Allata'ala assare kaputusang.

²Tunggala' panggaukanna taua nakulle kapang bajiki ri paccini' kalenna, mingka Batara angnganggaraki ero' pa'mai'na.

³Pappirannuangi mae ri Batara sikontu rancananu, nanukkulle lampa'jari ri nugaukanna.

⁴Sikontu apa Napareka Batara nia' natuju; na natujua tau ja'dalaka iamintu kapanrakang.

⁵Sikontu tau borroa nikabirisi ri Batara; tena Nakellai ke'nanga ta'lappasa' battu ri hukkunganga.

⁶Tau tenaya namminra nyawana mae ri Allata'ala lanipammopporangi; tau mappilangngeria lanipalili battu ri sikontu kaja'dallanga.

⁷Punna nupakasannang pa'mai'Na Batara, musu-musunnu laNapa'jari agangi.

⁸Bajikangngangi sike'de' panggappanga assala' battu ri kalambusang, kala jaia panggappang lanri gau' tena naadele'.

⁹Akkullei rupataua appare' rancana, mingka Allata'ala ampattantui oloang tallasa'na.

¹⁰Karaenga annarimai koasa battu ri Allata'ala, jari, tena nasala lalang kaputusanna.

¹¹Nakaerokangi Batara a'gau' lambusu' taua lalang pa'balu'-balukanga, kammayami lalang ammakea ukkurang siagang timbangang.

¹²Mae ri tukoasaya, nikanaya a'gau' ja'dala' iami karantassang, saba' jarreki pamarentahanna lanri kaadelang.

¹³Kasa'biang annabaya napakasannangi pa'mai'na tukoasaya, nakamaseangi tau a'bicara lambusuka.

¹⁴Pangngalarroinna karaenga sanrapangi kabara' hukkungang mate; tau cara'deka usahai untu' ampanaungi larrona!

¹⁵Kabajikang pa'mai'na karaenga appabattui salewangang, sanrapang rammang appaturunga bosi ri wattu timoro'.

¹⁶Bella' la'bi baji'na anggappaya kacara'dekang kala anggappaya bulaeng; la'bi lompoangngangi anggaranna anggappaya pangngassengang kala anggappaya pera'.

¹⁷Tau bajika napakabellai kalenna battu ri kaja'dallanga; tau amparhatikangai batena attallasa', najagai kalenna.

¹⁸Kaborroanga angngerangi kapanrakang; katampoanga angngerangi karuntungang.

¹⁹Bajikangngangi tuna pa'maika natena pa'barang-barangngang, kala amminawanga ri tau borroa nanikasia' barang-barang narampasaka ke'nanga.

²⁰Parhatikangi apa nipangngajarranga mae ri kau, nalanugappa apa-apa bajika. Tappakko mae ri Batara, na nulamate'ne.

²¹Tau cara'deka niassengi nibatei battu ri pikkirang taranna; angngallei pa'mai' batena a'bicara, ampa'jari nipatappa' kana-kananna.

²²Kacara'dekanga iami kabattuanna mate'nena tallasa'na tau bajika akkala'na; tau toloa nisessai ri katoloang kalenna.

²³Pikkiranna tau bajika akkala'na ampa'jari cara'deki kana-kananna, siagang pila' nipatappaki ajaranna.

²⁴Kana-kana bajika sanrapangi je'ne' bani; te'nei kasia'na siagang napakkamalei tubua.

²⁵ Nia' oloang lambusuki cinikanna, mingka kala'busanna anjo oloanga mangei ri kamateanga.

²⁶Kaparalluang untu' angnganre, iami saba' nausaha taua; lanri battanna, natarpassa anjama.

²⁷Tau ja'dalaka usahai ancilakai paranna tau; ja'dalaki kana-kananna sanrapang pepe' a'bara.

²⁸Tau jekkonga akkala'na appaumbai pa'beserang; tau nangaia ampitinai paranna tau appasisa'laki bela mabaji'.

²⁹Tau sekkeka natipui bela-belana, na naerang ke'nanga antama ri bahayaya.

³⁰Tutuko ri tau ta'muria siagang akkedo kanynyinga, nia' antu rancana ja'dala' lalang ri atinna.

³¹Tau lambusuka lanisarei umuru' la'bu; uanna sanrapangi songko' kalompoang accaya.

³²Bajikangngangi tenaya nilinta' larro, kala anna'gala' koasa; bajikangngangi nilewaia kalea, kala ammeta se're kota.

³³Untu' angngassengi sarenna, ammuangi taua campalle', mingka ampattantuai kale'bakkanna, Bataraji bawang.