Read Makassar Version – KITTA' MATANGKASA PANGNGEBARANG 17 Bible Online

PANGNGEBARANG 17 - Makassar Version – KITTA' MATANGKASA bible

PANGNGEBARANG 17

¹Bajikangngangi sisoang bawang kanre assala' amangi kala kanre nyamang alla'bi natuli nia' pa'beserang.

²Ata cara'deka lakoasai mae ri ana' appakasirika; na lannarima warisi' siagang sikamma sari'battanna anjo anaka.

³Bulaeng siagang pera' niuji' ri pepeka, mingka atinna taua niuji ri Batara.

⁴Tau ja'dalaka naturuki pikkirang ja'dalaka, paballe-ballea nangai appilangngeri kana-kana pitina.

⁵Inai ancau-caui tu kasi-asi puppusuka, nahinai Allata'ala Mappa'jarina. Inai rannu lanri kasusaanna tau maraenga, mattantu anggappana hukkungang.

⁶Kalompoang pa'mai'na tau toayamo, iamintu ana' cucunna; kalompoang pa'mai'na ana'-anaka, iamintu tau toana.

⁷Tau nipakalompoa, tasiratangai akkana balle-balle; tau dongoka tasiratangai akkana nia' matu-matunna.

⁸Nia' tau angkapangi angkana anjo doe' pammuccuka akkullei appa'jari apa appakalannasa'; lanri doe' pammuccu' yangasenna akkullei nipa'jari.

⁹Punna erokko ningai ri taua, pammopporangi kasalang nagaukanga ke'nanga. Punna manynyero kana ri kasalang poro mannappu'ji bawang passari'battangang.

¹⁰Se'rea pappasaile tinggiangngangi anggaranna mae ri tau bajika akkala'na kala sibilangngang paccambo' mae ri tau dongoka.

¹¹Tau ja'dalaka tuli appaumbai karicuang, mingka battui matea mae ri ia, a'jari suro pallaka.

¹²Bajikangngangi assibuntuluka siagang anrong beruang tappelaka ana'na, kala assibuntuluka siagang tau sibuka siagang kadongokanna.

¹³Inai ambalasaki kabajikanga siagang kaja'dallang, takkulle tongangngai nipasulu' kaja'dallanga battu lalang ri balla'na.

¹⁴Appakaramulaya pa'beserang sanrapangi anynyungke oloang je'ne'; lanri kammana anjo, ammono'boko mako ri tenanapa nappakkaramula anjo pa'beseranga.

¹⁵Nakabirisi Batara tau ampattojengai tau dorakaya, siagang nabilang sala tau tenaya nasala.

¹⁶Tena matu-matunna tau dongoka ampaccappuki doe'na a'boya kacara'dekang, saba' tena natangkasa' pikkiranna

¹⁷Se'rea sahaba' tuli tamamminrana mae ri aganna, se'rea sari'battang amminawang tongi antanggongi kasusaanga.

¹⁸Tau a'janjia antanggongi inranna paranna tau, iami tau tolo.

¹⁹Tau mangngaia ri dosa, nangai a'besere'. Tau lompo bicaraya, a'boyai kapanrakang.

²⁰Sitaua patipu tena nalamate'ne, tau appengkaya lilana langgappai bala.

²¹Anggappaya ana' tolo, sangkammami anggappaya si'na; a'jari mangge ri ana' tolo, tena nangngerang karannuang.

²²Rannu pa'maika napakkamalei tubua; pa'mai' susaya annepoki sumanga'.

²³Haking jekkonga, annarima cokko-cokkoi doe' pammuccu' siagang tena napajappai kaadelanga.

²⁴Natujua tau niaka pammahanna iamintu untu' anggappa kacara'dekang, mingka tau toloa tena nattantu pattujunna.

²⁵Ana' toloa nasusai manggena, siagang napakasi'nai pa'mai'na amma'na.

²⁶Tena nasiratang nipassala tau tenaya salana; tasiratangai nijallakkang tau bajika akkala'na.

²⁷Tau taranga pikkiranna, tajaiyai bicaranna. Tau cara'deka, tuli sannangi.

²⁸Manna tau toloa lanikapang cara'de' siagang tarang pikkiranna punna a'mereki na natongko' bawana.