Read Makassar Version – KITTA' MATANGKASA PANGNGEBARANG 19 Bible Online

PANGNGEBARANG 19 - Makassar Version – KITTA' MATANGKASA bible

PANGNGEBARANG 19

¹Bajikangngangi tu kasi-asi lambusuka ri tallasa'na, kala tau tolo nangaia a'balle-balle.

²Rajeng nampa tena pangngassengang, tena nabaji'; tau akkaro-karoa lappareki kasalang.

³Napakarugi kalenna rupataua lanri kadongokanna, nampa Batara nasalakang ri anjo passalaka.

⁴Tau kalumanynyanga tuli katambangi aganna; tu kasi-asia ba'lalo nipilari ri aganna.

⁵Tau a'balle-ballea ri pangadelanga, takkulleai naliliang hukkunganga.

⁶Tunggala' tau usahai angngallei pa'mai'na tau malompoa; sikontuna taua eroki a'jari agang mae ri tau nangaia assare.

⁷Tau kasi-asia nibalang parekangi ri sari'battanna, sarroangampa na ri aganna. Manna antekamma batena usaha takkulleai naalle pa'mai'na ke'nanga.

⁸Inai angngondang pangngassengang, nakamaseangi kalenna; na inai angngu'rangi apa napappilajaria, lamate'nei.

⁹Tau a'balle-ballea ri pangadelang mattantu lanihukkungi siagang nipanraki.

¹⁰Tasiratangai tau toloa tallasa' kala'biang, na tena todong nasiratang ataya amparentai tukoasaya.

¹¹Tau cara'deka akkullei natahang larrona. Nipuji lanri tanajampangiai kasalanna taua mae ri kalenna.

¹²Larrona karaenga sanrapangi sa'ra arrunna singaya; kabajikanna karaenga sanrapangi saliu' ambasai timbo-timboanga.

¹³Ana' toloa akkullei napanraki manggena. Baine nangaia a'moro-moro sanrapangi je'ne' tenaya nammari-mari ammatti'.

¹⁴Ballaka siagang barang-baranga akkullei nagappa battu ri manggena, mingka baine cara'deka iami passareNa Batara.

¹⁵A'malasa'-malasaka akkullei napajannang tinrona taua, kale'bakkanna lanaallei cipuru' anjo lapung tau malasa'.

¹⁶Tau mannurukia ri sikamma parentaNa Allata'ala lasalamaki, tau tenaya naanggaraki lamatei.

¹⁷Annulung tau kasi-asi sanrapangi assare angnginrang ri Batara; Batara sallang lambalasaki.

¹⁸Atoro' bajiki ana'nu lalang nia'na ija panrannuang; punna tena, sanrapang erokko ri kapanrakang.

¹⁹Boli'mi kamma tau lintaka larro nakasia' kale'bakkanna. Punna nutulungi, poro nutambaiji kalarroanna.

²⁰Punna nungai appilajara' siagang allangngere' pappakainga', sallang la'jariko tau nia' kacara'dekannu.

²¹Rupataua jai rancanana, mingka kaputusanNa bawang Batara a'jari.

²²Sipa' nitayanga battu ri se'rea tau iamintu tamamminrana. Bajikangngangi kasi-asia kala a'jari paballe-ballea.

²³Pakalompoi Batara, na nuttallasa' mate'ne; lasukkuki pakkasia'nu siagang lata'lappasakko battu ri balaya.

²⁴Nia' tau teai sipato' malasa'na; manna anynyoanga kanre mae ri bawana kuttu tonji.

²⁵Punna nihukkung tau tampoa, anggappai pappilajarang tau tenaya pangalamanna. Punna nipasaile tau bajika akkala'na, lapila' katambangi kacara'dekanna.

²⁶Ana' assessayai siagang ambongkayai tau toana, iami ana' appakasiri' siagang nicalla.

²⁷Ana', punna taeroka mako appilajara', lanukaluppai apa le'baka nupappilajari.

²⁸A'jari sa'bi balle-balle, sangkammai nibawangngang hukkunga; ambalai taua, bajiki kasia'na ri tau ja'dalaka.

²⁹Tau tolo tinggi langgaya mattantu laniba'ji.