Read Makassar Version – KITTA' MATANGKASA PANGNGEBARANG 2 Bible Online

PANGNGEBARANG 2 - Makassar Version – KITTA' MATANGKASA bible

PANGNGEBARANG 2

¹Ana', tarima laloi ajarang-ajarangku, siagang tuli u'rangi laloi sikamma pappakaingakku mae ri kau.

²Parhatikangi nikanaya cara'de' siagang usahai ampahangi.

³Iyo, ana', usahai laloi untu' ampahangi pikkirang taranga siagang appalakko pangngassengang.

⁴Boyai anjo kammaya sanrapang a'boya bulaeng, siagang ondangi anjo kammaya sanrapang angngondang pakkalumanynyangngang taccokkoa.

⁵Lanri kammana lanuassemmi angkanaya apa battuanna nikanaya malla' ri Batara, siagang lanugappami pangngassengang ri sesena Allata'ala.

⁶Batarami assare kacara'dekang; battu ri Iami rupataua anggappa pangngassengang siagang pammahang.

⁷Mae ri tau lambusuka pa'mai'na siagang tenaya callanna, Natulungi siagang Najagai.

⁸Najagai Batara tau adeleka ri panggaukanna, siagang Nala'langi ke'nanga mangngaia ri Ia.

⁹Punna mannurukiko ri nakke ana', lanuassengi anjo apa nikanaya adele', lambusu', siagang baji'. Lanuasseng tongi angkana antekamma batenu nukkulle tulusu' attallasa'.

¹⁰La'jariko tu cara'de', siagang anjo pangngassengannu lanapakarannui pa'mai'nu.

¹¹Lanikatutuiko ri pammahannu siagang kacara'dekannu,

¹²kammayatompa lanapisangkaiko anturuki batena tau tenaya nabaji' batena attallasa', kammayatompa nupakabellai kalennu battu ri sikamma tau ja'dalaka bawana.

¹³Taerokai ke'nanga anturuki nikanaya cara attalasa' bajika; oloang sassang siagang rassia dosa naolo ke'nanga.

¹⁴Battu ri kaja'dallanna ke'nanga napanggappai kasannangngang.

¹⁵Kodi sipaki siagang jekkongi ke'nanga lalang tallasa'na.

¹⁶Ikau ana', lakkullei nutolla' panynyonyo'na baine ja'dalaka, ia eroka angngallei pa'mai'nu, ammake kana-kana te'ne.

¹⁷Anjo baine kammaya tajarrekai pa'mai'na mae ri bura'nenna, siagang nakaluppaimi janjinna mae ri Allata'ala.

¹⁸Punna mangeko ri balla'na battuanna mange mako ri kamateanga. A'lampaya mange anjoreng sangkamma le'baki nikanaya a'lampa mange ri linona tau matea.

¹⁹Tau a'lampaya mange ri ia talammoterami mange ri oloang lamangea ri katallassanga.

²⁰Lanri kammana ana' pinawang laloi bate tallasa'na tau bajika, siagang attallasakko situru' ero'Na Allata'ala.

²¹Nasaba', tau attallasaka situru' ero'Na Allata'ala, iamintu tau lambusuka pa'mai'na, iami ke'nanga lammantang ri pa'rasangang le'baka Napa'janjiang Batara.

²²Mingka tau ja'dalaka siagang tau dorakaya lanipasambilai assulu' ri Allata'ala battu ri anjo pa'rasanganga, sanrapang ruku' nibi'buka battu ri buttaya.