Read Makassar Version – KITTA' MATANGKASA PANGNGEBARANG 20 Bible Online

PANGNGEBARANG 20 - Makassar Version – KITTA' MATANGKASA bible

PANGNGEBARANG 20

¹Inungang terasaka napa'jari kurangajaraki siagang ricui taua. Toloi tau angnginunga sa'genna nasa'ring.

²Larrona karaenga sanrapangi sa'ra arrunna singaya; tau ampakanassuai sangkammai nacilakai kalenna.

³Tau toloaji bawang nangai a'besereka; sipa' nipujia iamintu mabellaya battu ri pa'beseranga.

⁴Pamarri malasaka tanajamayai kokonna punna narapi' wattunna; kale'bakkanna tena apa-apa wassele' tanana punna pakkattoang.

⁵Bone atinna taua sanrapangi bungung lantang; mingka akkullei nise'ro' ri tau niaka pammahanna.

⁶Jai tau nakana kalenna agang, mingka tau tenaya tojeng pamminrana, sukkaraki nigappa.

⁷Ana'-anaka upaki punna nia' manggena mabajika siagang malambusuka ri tallasa'na.

⁸Punna ammempo karaenga ri kaderaya ri pangadelang, akkullei nacini' sikontu tau ja'dalaka.

⁹Maka nia' tau akkulle angkana, “Tangkasaki atingku, ta'lappasaka' battu ri dosaya?”

¹⁰Timbangang siagang ukkurang jekkonga taNangaiyai Batara.

¹¹Battu ri panggaukanna anaka nakkulle niasseng apaka bajiki siagang lambusuki gau'na.

¹²Tolia untu' allangngere' siagang mataya untu' accini', rua-ruana Batara ampa'jari.

¹³Tau nangaia attinro latu'guru' kasi-asi. Tau rajenga anjama jai kanre-kanreanna.

¹⁴Paballia tuli akkunrareng ri passala' ka'jala'na apa-apaya. Mingka punna le'ba'mo naballi, nakalompoammi pa'mai' lanri anjo ballinna naballiangi.

¹⁵Kana-kana ammonea pangngassengang, tinggiangngangi anggaranna kala bulaenga na barlianga.

¹⁶Inai antanggongi inranna tau maraenga, siratangi nialle barang-baranna untu' a'jarri panynyikko' janjinna.

¹⁷Barang-barang wassele' nitipua, uru-uruna bajiki kasia'na, mingka kale'bakkanna sanrapangi batu-batu kasia'na.

¹⁸Rancanaya a'jari lanri tangara'; lanri kammana anjo, teako appattujuangi punna tena rancana baji'.

¹⁹Tau nangaia ambicarai paranna tau, takkulleai anynyokko rahasia; teako assileporangi siagang tau jai dudua bicaranna.

²⁰Tau antunrayai tau toana, lalanynyaki tallasa'na sanrapang lampu matea ri wattu bangngi sassanga.

²¹Barang-barang lintaka gappanna, kale'bakkanna teai barakka'.

²²Teako balasaki kaja'dallanga siagang kaja'dallang; tappakko ri Batara, Iami lantulungko.

²³Timbangang siagang batu timbangang jekkonga taNangaiyai Batara.

²⁴Le'ba' Napattantumi Batara oloang tallasa'na rupataua ri anne linoa; lanri kammana minjo natakkullea napahang oloang katallassang kalenna rupataua.

²⁵Pikkiri' baji'-bajiki ri tenanapa nu'janji lassare koro'bang mae ri Batara. Gassingka assesse' lalang jako ri boko.

²⁶Karaeng cara'deka naassengi angkana inai tau ja'dala'; lanahukkungi na tanapammopporangnga ke'nanga.

²⁷Ati mailalanna taua iami singara' battu ri Batara ansingari sikontu atinna.

²⁸Punna ammarenta karaenga siagang mangngamaseang, lambusu', siagang adele', latuli makoasai.

²⁹Tau rungkaya nikangalikangi lanri kagassinganna, na nipakalompo tau toaya lanri uwanna.

³⁰Nia' wattunna na pangalamang paika allu'luki kaja'dallanga, siagang natangkasi atinna rupataua.