Read Makassar Version – KITTA' MATANGKASA PANGNGEBARANG 21 Bible Online

PANGNGEBARANG 21 - Makassar Version – KITTA' MATANGKASA bible

PANGNGEBARANG 21

¹Sanrapang batena Naatoro' Batara je'ne' binangaya sollanna a'lo'loro' situru' ero'Na, kammatommi anjo napimpingi pikkiranna karaenga.

²Tunggala' panggaukanna taua nakanai baji' ri paccini' kalenna, mingka Batara angngassengi nakaerokia pa'mai'na.

³Panggaukang adeleka siagang annabaya la'bi napakasannangi pa'mai'Na Batara, kala sikontu passarea.

⁴Anjo tau ja'dalaka dorakai, lanri nikoasai ri katampoanna siagang kaborroanna.

⁵Rancanana tau rajenga angngerangi kala'biang; gau' akkaro-karoa kakurangang kale'bakkanna.

⁶Kakalumanynyangngang nigappaya siagang tena lambusu' lintaki tappela' siagang naerangi taua mae ri kuburuka.

⁷Tau ja'dalaka taerokai mannuruki ri hukkung; nisessai ri kapallakkang kalenna.

⁸Tau salaya, a'lekko-lekkoi oloanna; tau bajika tuli lambusuki tallasa'na.

⁹La'bi sannangi taua ammantang ri panyingkulu'na lotenga kala assiballaka siagang baine pabesereka.

¹⁰Tau ja'dalaka tuli eroki anggaukangi kaja'dallanga; manna ri nai tena pangngamaseanna.

¹¹Hukkunganna tau pacau-caua a'jari pappilajarangi mae ri tau tenaya pangalamanna. Punna nipasaile tau bajika akkala'na, lapila' katambangi kacara'dekanna.

¹²Allata'ala Kaminang Adeleka Naassengi apa kajarianga lalang ri balla'na tau dorakaya. LaNapaloposoki ke'nanga sa'genna panra'.

¹³Inai taeroka mappilangngeri ri kunrarenna tau kakuranganga, tena todong nalaniparhatikang punna appala' tulung.

¹⁴Untu' ampanaungi larro duduna taua, a'mere'-merekiko ansarei hadia.

¹⁵Punna nipajappa kaadelanga, baji'mi pakkasia'na tau bajika, mingka tau ja'dalaka tena naamang nasa'ring.

¹⁶Tau tamannurukia ri bate tallasa'na tau bajika akkala'na, mattantu labattui mange ri linona tau matea.

¹⁷Tau nangaia assannang-sannang latuli kakurangangi; tau nangaia a'labo-labo takkulleai a'jari kalumanynyang.

¹⁸Punna nihukkung tau jaia ri Batara, teai tau bajika, mingka tau ja'dalaka anggappa kasusaang.

¹⁹Bajikangngangi ammantanga ri parang luaraka, kala sipammantangnganga siagang baine nangaia a'moro-moro siagang a'larro-larro.

²⁰Tau cara'deka tuli kala'biangi siagang kalumanynyangi mingka tau toloa napa'laboangi barang-baranna.

²¹Inai usaha sollanna nigaukang kaadelanga siagang mangngamaseanga, langgappai kasalewangang, kalompoang, siagang la'bu umuru'.

²²Tau cara'deka akkullei naalle kota nijagaia ri tantara barani; naruntungi pattahangngang napattoanga ke'nanga.

²³Sollanna nililiang kasukkaranga, parallui tutu taua ri kana-kana.

²⁴Tau borroa siagang tinggi langgaya nangai accalla siagang kurangajara'.

²⁵Lapung tau malasaka taerokai anjama; nabunoi kalenna ri kacinnanna;

²⁶sila'busu' allo iaji bawang nanawa-nawa apa nakaerokia. Kabalekanna, tau lambusuka ri tallasa'na akkullei assare alla'bi-la'bi.

²⁷Tasannangngai Batara ri passarena tau dorakaya, la'biangampa punna napassareang lanri nia'na pattujuang nicallana.

²⁸Kasa'bianna paballe-ballea tena nalanipatappa'; mingka kananna tau angngassengai lampa-lampana parkaraya, lanitarimai.

²⁹Tau lambusuka tappaki ri kalenna; tau ja'dalaka akkapala' rupai.

³⁰Tena kaporeang, tarang pikkirang, siagang kacara'dekang akkulle attahang ri dallekanNa Batara.

³¹Manna pole nipa'langka' pa'bundukanga siagang jarang pa'bundukang, mingka ampattantuai pammetanga iamintu Batara.