Read Makassar Version – KITTA' MATANGKASA PANGNGEBARANG 22 Bible Online

PANGNGEBARANG 22 - Makassar Version – KITTA' MATANGKASA bible

PANGNGEBARANG 22

¹Areng bajika lompoangngangi anggaranna na barang jaia; bajikangngangi nikamaseanga na nisarea pera' siagang bulaeng.

²Tau kalumanynyanga siagang tu kasi-asia nia' sangkammanna: Batara ngaseng ampa'jari ke'nanga.

³Tau cara'deka a'lili punna accini' bahaya; tau toloa a'jappa tulusuki nampa nituju ri bala.

⁴Tau mappilangngeria ri Batara na napakatuna kalenna, lamate'nei, kala'biangi, siagang nipakalompoi.

⁵Sikkoka siagang tadoka niaki ri oloanna tau jekkonga, liliang ngasengi anjo sikammaya, punna erokko salama'.

⁶Ajaraki se'rea ana' antekamma batena siratang attallasa', na sa'genna toa tuli lakammana batena attallasa'.

⁷Tu kasi-asia nikoasai ri tau kalumanynyanga; tau angnginranga nikoasai ri tau assarea angnginrang.

⁸Tau appakioroka kajekkongang lakkattoi bala; kale'bakkanna lalanynya'mi appaero'-ero' na appanggaukang.

⁹Tau baji' pa'maika nibarakkaki ri Batara, lanri nabagei dalleka siagang tau kakuranganga.

¹⁰Bongkai tau nangaia anghina, nammari passisalanga, passimusuanga, siagang sicalla-callaya.

¹¹Tau nangaia kalambusanga siagang te'nei bicaranna, la'jari sahaba'na karaeng.

¹²Lanri nisungkena balle-ballena tau jekkonga, Najagaimi Batara sollanna tuli niparakai pangngassengang tojenga.

¹³Lapung tau malasaka nangai ammantang ri balla'; nakana, “Nia' singa pantara', nakanrea' sallang ri tangngana aganga.”

¹⁴Panynyonyo'na baine salaya sangkammai sikko'; tau nikalarroia ri Batara loposoki antama'.

¹⁵Siratangi ana'-anaka anggaukangi katoloanga, mingka raukanga akkulle angngajaraki ke'nanga sollanna napinra panggaukanna.

¹⁶Inai ero' a'jari kalumanynyang na najallakkang tu kasi-asia na nasare hadia tau nia'-niaka kale'bakkanna lasurokaui.

¹⁷Pilangngeri, lakupangngajarrangi mae ri kau pappakainga' bajika! Parhatikangi pangngajarakku.

¹⁸Lasannangko punna nuboli' ri pa'mai'nu anjo pangngajarangku. Na lanri kammana sadia mako punna erokko ampakei.

¹⁹Kupangngajarrangi mae ri kau kamma-kamma anne lanri kukellaiko ampatanjengi panrannuannu mae ri Batara.

²⁰Tallumpulo pappakainga' le'ba' kutulisi' untu' ikau, iamintu pappakainga' ammonea pangngassengang siagang pappakainga' baji';

²¹siagang lampangngajarrangi mae ri kau apa annaba tojeng-tojenga. Sallang, punna nikuta'nangko, akkullei annaba pappialinnu.

²²Teako pakarugi tu kasi-asia, kalanri lammana bawang; na punna ri pangadelang teako alle passai ha'na tu tenaya pakkullena.

²³Saba', laNialleangangi ri Batara ri parkarana ke'nanga, siagang laNaallei nyawana tau anjallakkangai ke'nanga.

²⁴Teako sileporangi siagang tau nangaia larro siagang tau lintaka bambang cera'na.

²⁵Sallang lanuturuki, nampa takkullea nupela' anjo kabiasanga.

²⁶Teako a'janji untu' antanggongi inranna tau maraenga.

²⁷Punna sallang tanukullea allappassi, manna katinroannu lanialleang jako.

²⁸Tea sikaliko appalessoki pa'baeng-baeng butta, ia le'bakamo napattantu boe-boenu.

²⁹Le'bakko anciniki tau cara'deka anggaukangi jama-jamanna? Anjo taua lanisarei jama-jamang ri balla' lompona sikamma karaenga, teai balla' biasaya.