Read Makassar Version – KITTA' MATANGKASA PANGNGEBARANG 23 Bible Online

PANGNGEBARANG 23 - Makassar Version – KITTA' MATANGKASA bible

PANGNGEBARANG 23

¹Punna ammempoko sipangnganreang se'rea tau malompo, u'rangi angkana inai anjo taua.

²Punna lompo napasunu angnganre, tahangi anjo napasunu.

³Teako angngoai ri kanre nyamang nipatalaya, gassingka eroki antannangngiko sikko'.

⁴Teako susa dudui kalennu untu' a'jari kalumanynyang. Pammari anjo pattujuang kammanu.

⁵Saba', lalang sipakkida mataji nakkulle lanynya' barang-barannu, sanrapang akka'nyiki nanri'ba' nai' ri allaka sangkamma jangang-jangang rajawali.

⁶Teako sipangnganreangi siagang tau gi'gilika. Teako eroki ri kanre nyamanna.

⁷Saba', lanakana, “Maeko angnganre; annombongko pole,” mingka sikontutojenna tena nakamma anjo lalang ri atinna. Te'nei ri bawana, mingka atinna maraengi.

⁸Anjo sallang apa le'baka nua'lu' nulangngeangi ammotere', na sikontu kana-kana te'nenu mae ri ia tena matu-matunna.

⁹Teako appakaingaki tau tolo; tena nalanaanggara' anjo pappakainga'nu.

¹⁰Tea sikaliko appaletteki pa'baeng-baeng butta sossorang yareka nuallei buttana ana' kukanga.

¹¹Saba', Batara makassaka mangngalleanganga, Iami langngalleangangi ke'nanga lambaliangko.

¹²Parhatikangi ajaranna gurunnu siagang appilajarakko jai-jai.

¹³Teako bata-batai angngajaraki ana'nu. Punna nutunrungi siagang raukang, tena nalamate,

¹⁴ba'lalo lasalamaki.

¹⁵Ana', sannang sikalia' punna cara'dekko.

¹⁶Lompoi pa'maikku punna kulangngerekko appasulu' kana-kana annaba sikali.

¹⁷Teako angngiri matai mae ri tau dorakaya. Tuli mannurukiko ri Allata'ala,

¹⁸sollanna baji' allo ri bokonu, siagang tena natappela' panrannuannu.

¹⁹Pilangngeri, na'! A'jariko cara'de'. Parhatikang tojeng-tojengi batenu attallasa'.

²⁰Teako sileporangi siagang painunga siagang tau angngoaya,

²¹saba' anjo ke'nanga la'jari kasi-asi. Punna attinrojako bawang, tasalloami nummakeang kekke'-kekke'.

²²Mannurukiko ri manggenu; saba' punna tenai, tena nu'jari tau. Punna toamo amma'nu, picinikiangi angkanaya nupakalompoi.

²³Ajarang annabaya, kacara'dekang, pangngajara', siagang pammahang, yangasenna anjo siratangi niballi, mingka tena nasiapa anggaranna lanibalukang.

²⁴Se'rea mangge larannui punna baji' akkala'na ana'na; lalompoi pa'mai'na punna cara'de' ana'na.

²⁵Dasi-dasi nalompo pa'mai'na anrong manggenu mae ri kau, dasi-dasi namate'ne baine allassukangiako.

²⁶Parhatikangi baji'-baji', siagang contoi tallasa'na, ana'!

²⁷Baine sala assundalaka sangkammai sikko' lompoa bahayana.

²⁸Angngadangi ke'nanga sanrapang paella' siagang napa'jari tau bura'nea jai a'gau' sala.

²⁹Nuassengi apa kajarianna ri tau angnginunga anggoro' jai dudu, na masarro nakasia' inungang terasaka? Anjo taua a'jari sessai siagang pa'risiki ri katallassanna. Tuli a'besereki siagang akkunrarengi. Ejai matanna siagang a'bokka'-bokkaki kalenna, na sikontutojenna akkulle ngasenji naliliang anjo sikammaya.

³¹Teako passareangngi kalennu nigoda ri anggoro', manna pole naga'ga dudu tanja'na siagang accilla'-cilla' tanja'na lalang ri kacaya, kammayatompa nyamang sikali nisa'ring assolong antama' ri kallonga.

³²Ammukona bari'basa' sangkammami nusa'ring tau le'baka nitotto' ri ulara' a'racung.

³³Amminroi paccini'nu, tena silolongang pikkirannu siagang pitikana-kanai bawanu.

³⁴Kammai pakkasia'nu tau niaka ri coppo'na benteng kappala' niaka ri tangnga tamparang; dangngalaki ulunnu siagang ta'royong-royongko.

³⁵Nampa lanukana, “Nia' kutadeng tau antunrunga' siagang antempa ka'ranga', mingka takkulleai kuu'rangi angkana apa kutadeng le'ba' kajariang. Dedeh, ta'do'do' dudua'! Parallua' pole angnginung!”