Read Makassar Version – KITTA' MATANGKASA PANGNGEBARANG 24 Bible Online

PANGNGEBARANG 24 - Makassar Version – KITTA' MATANGKASA bible

PANGNGEBARANG 24

¹Teako angngiri matai mae ri tau ja'dalaka, siagang teako eroki a'bela siagang ke'nanga.

²Poro kapallakkang bawang nanawa-nawa ke'nanga siagang apa langngeranga bawang bala nacarita.

³Pakkalabinianga nibangungi siagang kacara'dekang kammayatompa pammahang baji'.

⁴Na punna nia' pangngassengang, lalangka'mi kaboneang sikamma kamara'na siagang barang-barang ka'jala' na ga'ga.

⁵Tau cara'deka la'bi nikangalikangi na tau kassaka; pangngassenganga la'bi paralluangngangi na kagassinganga.

⁶Nasaba' ri tenanapa ni'bundu parallui nia' rancana baji' rolong, siagang pila' jai tumappakainga', pila' lompoi panrannuanga lammeta.

⁷Tau toloa takkulleai naselangngi kacara'dekanga. Tena apa-apa akkulle napau punna a'bicara taua ri passala' apa-apa parallua.

⁸Tau tuli a'rancanaya kaja'dallang, laniarengi tupparicu.

⁹Tunggala' akkala'na tau toloa iamintu dosa. Tau tuli accallaya ri paranna tau, tena ningai ri yangasenna taua.

¹⁰Punna tappu' pa'minasako lalang ri kasukkarang, ikau tau lammako.

¹¹Teako ranggaselai allappassangi tau nihukkung mateamo; pasalamaki tau nierangamo mae ri panggentunganga.

¹²Akkulle jako angkana, “Anjo teai urusangku.” Mingka Najannangngiko Allata'ala. Naassengi siagang Naadeli pikkirannu. Nabalasaki rupataua situru' panggaukanna.

¹³Ana', angnganreko bani, saba' anjo bajiki. Sangkamma anjo je'ne' bania battui ri ru'mung bania, te'nei untu' nikanre,

¹⁴kammatommi anjo, anjo kacara'dekanga bajiki untu' nyawanu. Punna cara'dekko, singara'mi allo lanudallekanga.

¹⁵Teako sangkammai tau ja'dalaka, assikongkoloki untu' angngellaki tau lambusuka siagang anrampasaki balla'na.

¹⁶Saba', manna pole a'mole-mole tu'guru' tau lambusuka, tuli lambangung poleangi nai'. Mingka kabalekanna, tau ja'dalaka laancuruki nituju ri bala lompo.

¹⁷Teako sannangngi pa'mai'nu punna natuju bala musunnu, siagang teako rannui punna tu'guruki.

¹⁸Saba', mattantu laNaciniki Batara anjo panggaukannu siagang Nabilang ja'dalaki, nampa tenamo Nahukkungi anjo musunnu.

¹⁹Teako birisiki yareka angngiri matai mae ri tau ja'dalaka.

²⁰Tau ja'dalaka tena allo ri bokona siagang tena panrannuanna.

²¹Ana', mallakko ri Batara, siagang pakalompoi karaenga. Teako katuru'-turukangi mae ri tau angngewayai ke'nanga.

²²Tau kammaya anjo akkullei ancuru' lalang sipakkida mata, lanri anjo bala Napa'niaka Allata'ala yareka karaenga teai parkara ca'di-ca'di.

²³Tau cara'deka le'baki akkana kamma anne: Hakinga takkulleai battala' siali.

²⁴Punna tau salaya nakana tena nasala, anjo hakinga lanitunrai siagang lanipakkanai ri sikontu tau jaia.

²⁵Mingka haking anghukkungai tau salaya lamate'nei siagang lanipakalompoi.

²⁶Pappiali annabaya iami tanra passiagangngang sitojennaya.

²⁷Teako ambangungi pakkalabiniang punna tenapa nupasadiai kokonnu siagang nia'mo pa'boya-boyannu.

²⁸Teako a'jari sa'bi mae ri tau maraenga punna tena siratang alasannu; teako a'balle-ballei ri passala'na anjo taua.

²⁹Teako angkanai, “Lakubalasaki mae ri ia apa le'baka nagaukang mae ri kalengku!”

³⁰Le'baka' allalo ri kokonna siagang koko anggoro'na se'rea tau malasa' siagang tolo.

³¹Ia kucinika anjoreng poro timbo-timboang akkatinting siagang rea bawang. Runtummi kalli' tembo'na.

³²Le'ba'na kuparhatikang siagang kunawa-nawa anjo passalaka, kugappami anne pappilajaranga:

³³ Lanri ta'do'do' siagang attinro sinampe', lanri ammempo a'raka' lima siagang ammari-mari sinampe',

³⁴battumi kakuranganga siagang kakasi-asianga a'bakka sanrapang paella' angngerang sanjata.