Read Makassar Version – KITTA' MATANGKASA PANGNGEBARANG 25 Bible Online

PANGNGEBARANG 25 - Makassar Version – KITTA' MATANGKASA bible

PANGNGEBARANG 25

¹Anne nia' siapa are pappakainga' maraengang battu ri Salomo, nisalinga ri siapa are pagawena balla' lompona Karaeng Hizkia, karaeng tu Yehuda.

²Nipakala'biriki Allata'ala lanri apa-apa Narahasiakanga; karaenga nipakalompoi lanri apa akkullea napakasingara'.

³Sanrapang tamparang lompo lantang siagang langi' tinggia, kammaminjo pikkiranna karaenga takkulleai niselangngi.

⁴Tangkasi rolong peraka battu ri ra'masa'na, nampami ga'gaya nipare' ri panrea.

⁵Pakabellai sikamma pappakainga' ja'dalaka battu ri balla' lompoa, nampami jarre' pamarentahanga lanri kaadelang.

⁶ Punna andallekangko ri karaeng, paralluko tuna pa'mai', teako a'gio' kammai tau tinggi empoannu.

⁷Bajikangngangi nisuroa nai' ri tampa' malompoanganga kala nisuroko ampassareangi anjo tampa'nu mae ri tau tinggianganga pangka'na.

⁸Teako akkaro-karo dudu angngerangi parkaranu mange ri pangadelang; saba', punna kale'bakkanna a'nyatai angkana ikau sala, apapi pole akkulle nugaukang?

⁹Punna sisala pahangko agannu, ia tommo bawang nuagang ampa'le'baki, mingka rahasiana tau maraenga teako sungkei.

¹⁰Saba', sallang ikau niarengko tau boncoro' bawa siagang kodimi arennu lalang sikontu tallasa'nu.

¹¹Tangara' nipasuluka ri wattu coco' sikalia sanrapangi rappo bulaeng lalang ri panne pera'.

¹²Pappasailena tau cara'deka mae ri tau eroka mappilangngeri, sanrapangi cincing bulaeng yareka belo-belo bulaeng.

¹³Tunisuro tamamminraya, napakasannangi nyawana tumassurona, sanrapang je'ne' dinging nakasiaka pakattoa ri kokoa.

¹⁴Janji-janji tanirupaia, sanrapangi rammang siagang anging tamappaturunga bosi.

¹⁵Kasa'barrang nirurungangang ri kana-kana lamma akkullei napa'jari tappa' tukoasaya, siagang naancuru' sikontu angngewaya.

¹⁶Teako angnganrei bani jai dudu; gassingka napa'jari takkoakko.

¹⁷Teako a'mole-mole dudu a'manaikang ri siampi' balla'nu, gassingka lanrei nampa nakabirisiko.

¹⁸Tuduhang nipare'-pareka akkullei angngerang kamateang, sanrapang pa'dang, palu-palu, yareka ana' pana cidu'.

¹⁹Tappa' ri tau a'bali' ballang ri wattu kasusaang sanrapangi akka'lero ammake gigi a'gio' yareka a'jappa siagang bangkeng akkeppang.

²⁰Akkelong-kelong untu' tau natujua susa sanrapangi assolari tau ri wattu dinging, sanrapang appatiri' cukka ri loko'na.

²¹ Punna cipuru' musunnu, sarei kanre; punna turerei, sarei angnginung.

²²Lanri kammana nupa'jarimi tu'guru' siri'-siri' na laNabarakkakiko Batara.

²³Anging battu wara' mattantu langngerangi bosi; kamma tomminjo a'bi'nyaraka carita mattantu appaumbai kalarroang.

²⁴Bajikangngangi ammantanga ri panyingkulu' lotenna ballaka, kala assiballaka siagang baine pa'beseranga.

²⁵Annarimaya kabara' baji' battu ri pa'rasangang bella sanrapangi angnginung je'ne' dinging ri wattu turere.

²⁶Tau bajika, ampappibetangai kalenna mae ri tau dorakaya sanrapangi timbuseng je'ne' pucca' yareka bungung ra'masaka.

²⁷Tabajikai angnganre bani jai dudu, kamma tomminjo kana appalece jai dudua.

²⁸Tau tenaya nakkulle nalewai kalenna sanrapangi kota runrunga tembo' pattahanganna.